Presidenti Meta ka kthyer për rishqyrtim në Kuvend një tjetër ligj, atë për zhvillimin rajonal dhe kohezionin.
Për Metën, me përmbajtjen e miratuar ligji nuk mund të bëhet kurrsesi pjesë e legjislacionit të vendit pasi ndesh me disa dispozita, parashikimet e ligjit për vetëqeverisjen vendore, si dhe ligjin për ndarjen administrativo-territoriale të njësive.
Sipas tij, Këshillit të Ministrave i jepet autoriteti për të vendosur 4 rajonet e zhvillimit dhe kufijtë e tyre. Por këtë sipas Metës mund ta caktojnë vetëm Kuvendi, mbi bazën që i përcakton Kushtetuta.
“Kjo ndarje antikushtetuese dhe arbitrare, kufizon direkt çdo iniciativë që mund të kenë dhe ndërmarrin, në bazë të Kushtetutës dhe të ligjit, organet e qeverisjes vendore për të vendosur vetë për problemet që hyjnë në juridiksionin e tyre. Ky akt ligjëron ushtrimin e pushtetit politik të pakontrolluar mbi qeverisjen vendore, çka thellon edhe më shumë krizën e rëndë politike dhe kushtetuese në të cilën ndodhet sot vendi ynë”, thotë Meta.
Ai shton se nëse miratohet ligji do të krijohen struktura paralele për të rritur pushtetin politik të qeverisë për të kontrolluar vendimmarrjen deri në nivel vendor.
“ Ky akt ligjëron ushtrimin e pushtetit politik të pakontrolluar mbi qeverisjen vendore, çka thellon edhe më shumë krizën e rëndë politike dhe kushtetuese në të cilën ndodhet sot vendi ynë”, thotë Meta./Opinion.al
