Zëvendës Kryeministrja Senida Mesi ka folur sot nga foltorja e Kuvendit në terma konkretë lidhur me procesin e vetingut dhe ngritjen e institucioneve të tij, duke iu adresuar ndër të tjera edhe qëndrimit e sjelljes së opozitës.
“Opozita ka hallin e saj personal në përpjekje për t’i shpëtuar skanerit të këtyre institucioneve”, tha Mesi ndërsa deklaroi se kjo nismë e opozitës për veting në politikë është një marifet për t’iu shmangur reformës në drejtësi, ndërkohë që SPAK dhe BKH sigurojnë vetingun e politikes në shkallë shumë të gjerë.
“SPAK dhe BKH nuk kalojnë në sitë thjesht lidhjet e politikanëve me krimin, por mbi të gjitha pasurinë dhe të ardhurat e tyre. SPAK dhe BKH nuk ndalojne vetem tek politikanet, por edhe tek pasuria e te ardhurat e familjareve te tyre. SPAK dhe BKH nuk mjaftohen vetem me largimin e politikaneve te lidhur me krimin nga politika, por garantojnë që ndaj politikanëve të korruptuar dhe të lidhur me krimin, merren masa ndëshkuese deri edhe me burgim”, tha Zëvendës Kryeministrja duke deklaruar ndër të tjera, se reforma në drejtësi jep 100% garanci për veting real.
“Ne jemi gati për veting, por për veting të vërtetë dhe prandaj kemi mbështetur që ditën e parë Reformën në Drejtesi dhe ngritjen e Spak e të BKH për të hetuar e ndëshkuar politikanët e korruptuar. Reforma në drejtësi jep 100% garanci për veting real, por sidoqoftë ne jemi gati të ulemi e te diskutojmë çdo lloj propozimi me kushtin e vetem qe reforma ne drejtesi dhe ngritja e institucioneve te pavarura qe do te bejne edhe vetingun e politikes te mos ndalet”.
