Një 47-vjeçar është arrestuar, ndërsa një tjetër person është proceduar nga policia për armëmbajtje pa leje dhe gjueti të paligjshme.
Në pranga ka rënë Sh. T., 47 vjeç, si dhe filloi procedimi penal në gjendje të lirë për shtetasin F. P., 39 vjeç, të dy banues në fshatin Mallunxë, Mat, të cilët janë ndëshkuar edhe me masën administrative 80.000 lekë secili, për shkelje të moratoriumit të gjuetisë së paligjshme në Republikën e Shqipërisë.
Gjatë operacionit janë sekuestruar 2 armë gjahu çifte, 1 armë zjarri pushkë dhe 578 fishekë.
“Shërbimet e Komisariatit të Policisë Mat, në kuadër të planit të masave dhe forcimit të kontrolleve në zbatim të moratoriumit të gjuetisë në Republikën e Shqipërisë, kanë organizuar punën duke ushtruar kontrolle të befasishme në orare të vona. Si rezultat, në vendin e quajtur “Fusha e Lajthit’, Balgjaj, Bashkia Klos, shërbimet e Policisë kanë evidentuar dhe goditur një rast të armëmbajtjes pa leje. Gjatë kontrollit të zonës, shërbimet e Policisë kanë ndaluar dhe kontrolluar shtetasit Sh. T. dhe F. P., të cilët posedonin dy armë gjahu çifte që i mbanin pa leje, me të cilat dyshohej se po kryenin gjueti të paligjshme”, njofton policia.
Gjithashtu, kontrollit të ushtruar në një ambient në përdorim nga shtetasi Sh. T., në zonën e Balgjajt, është gjetur edhe 1 armë zjarri pushkë dhe një sasi municioni luftarak.
Materialet procedurale i kaluan Prokurorisë së Rrethit Gjyqësor Mat, për veprat penale “Mbajtja pa leje e armëve, armëve shpërthyese dhe e municionit” dhe “Mbajtja pa leje e armëve të gjuetisë dhe sportive” në ngarkim të shtetasit Sh. T., si dhe për veprën penale “Mbajtja pa leje e armëve të gjuetisë dhe sportive” në ngarkim të shtetasit F. P./Opinion.al
