Kryetari i PD, Lulzim Basha ishte edhe sot pasdite si shumë herë të tjera në protestën e banorëve të Unazës së Re. Ai tha se Edi Rama dhe Erion Veliaj kanë firmosur një afere skandaloze për të ndryshuar rrjedhën e lumit Lana. Kjo, tha Basha, nuk është parë e dëgjuar që prej kohës së Romës së lashtë.
Sipas liderit të së djathtës, kjo bëhet për të mos prekur kompleksin që do ndërtojë miku i Taulant Ballës me firmën e Ramës dhe Veliajt. “Në vend që këta familjarë të gëzojnë vitin e ri, rrinë këtu në mes të rrugës duke protestuar. Dua të them që afera që nisi si korrupsion i pastër është provuar si aferë kriminale. Rama e Veliaj kanë ndryshuar planin urbanistik, të ndryshojnë rrjedhën e lumit të Lanës, që të mos cënohet asnjë centimetër i një kompleksi të një ish-trafikanti që do ndërtojë. Shteti funksionon si institucion hajdut.
Të nxirret plani urbanistik i Tiranës të nënshkruar nga Rama e Veliaj, gjëja më absurde që nga koha e Romës së Lashtë. Ndërton aty ortaku i Taulant Ballës (Edmond Bego) me firmën e Ahmetaj, Ramës e Veliajt.
Këtë javë është zhvilluar një betejë qytetare me të keqen. Dukej sikur kjo betejë nuk do fitohej, se Rama suli gangsterët. Por qytetarët i duruan të gjitha”, tha Basha.
Ai shtoi se për opozitën është detyrë të mbështesë banorët që protestojnë qofshin ata banorë që do u prishen shtëpitë, studente e kushdo tjetër që po lufton këtë të keqe që është sot në pushtet.
