Nga Blendi Fevziu
Kush po e shkatërron Shqipërine, po pyesja veten dje, ndërsa ndiqja Parlamentin, ku debati ulej e ngrihej herë si vullkan e herë si tërmet.
Drogë, korrupsion, krime, trafiqe. Ministra të akuzuar për afera, cereku i të cilave do mjaftonte për ti mbyllur disa dekada pas hekurave të burgut; ish ministra qe përfliten nga vjedhja tek vrasja. Të rënda po ashtu.
Tërmeti i akuzave bëhet edhe më bucitës nga toni që ngrihet. Nga burra te veshur me kostume që s’e kanë gje ti thonë fjalen e fundit njeri tjetrit. Ne tërmetin e të enjtes. Një tërmet qe duket se do te shkaktojë cunam. Cunam që do t’i fshijë prej andej të gjithe. Por në fakt nuk fshin asnjë. As akuzat e tyre. Rishfaqen sërish të enjten duke bubullitur. Me po ato akuza. Akuza që janë përsëritur në ekranet e Tv gjatë javes.
Shumica e akuzave janë po ato. Shumica të kthyera para e prapa prej vitesh. Por thuajse asnjëherë të sqaruara deri ne fund. Akuza që i bëjnë pis të gjithë dhe i barazojnë në këtë batak të pakrahasueshëm me asnjë vend tjetër te rajonit. Se të botës jo e jo. Në fakt mossqarimi i tyre i shërben pikërisht politikës. Për te trazuar në kazanin e madh dhe të pista të tyre të vërtetat dhe gënjeshtrat. Për ta bërë edhe më të theksuar aksiomën: po the 99 të verteta dhe një gënjeshtër, ke thënë në fakt 100 gënjeshtra. Ndaj askush nuk sqaron asgjë. Por shfaqet të enjten e rradhës ne Parlament. Ridëgjojeni të enjten.
Akuzohej Berisha për korrupsion e deri vrasje. Berisha nuk ështe më në pushtet. O t’ja faktojne ose mos ti përmendin më. Rasti tragjik i Remzi Hoxhës qe u hap dje ka 20 vjet. PS ka qenë 2 here në pushtet. Ka pasur Prokuror të zgjedhur prej saj. O duhej ta njihte fajtor o t’i thoshte që s’ka faj.
Akuzohet Tahiri nga oficeri i policisë Zagani. Tahiri kanshkuar vetë në Prokurori. Prokuroria të shprehet qëndrojnë apo jo. Sepse njëri nga të dy është fajtor. Akuzuesi ose i akuzuari. Të dy bashkë nuk mund te qëndrojnë paqësisht në këtë shoqëri.
Akuzohet Ilir Beqja për tendera dhe afera. Ose ai është fajtor dhe merr ndëshkimin ose nëse akuzat nuk kanë bazë askush s’ka të drejte t’ja përmendi.
Janë me dhjetra akuza të tjera që ndotin cdo dite shoqërinë dhe që askush nuk di t’ju japë përgjigje. Dhe kjo bëhet akoma më e rëndë kur në këtë vend ku perceptimi për korrupsionin është me i lartë se kudo nuk ka asnjë politikan të rëndësishëm te dënuar për korrupsion. Asnjë të vetëm. Rasti DIA është më ulëritësi. Avokatët e huaj te qeverise shqiptare deklarojnë se është nje rast korrupsioni i pastër dhe i madh; deklarojnë se dinë ku janë transferuar paratë dhe kush janë përfituesit e tyre. Por deri më sot asnjë njeri nuk është marrë në pyetje. E jo me të dënohet.
Ndaj Shqipëria vijon të tronditet nga tërmeti i së enjtes. Me akuza e kunder akuza. Dhe të mbetet në po atë batak, ku te gjithë bërtasin kapeni hajdutin dhe ku askush në fakt nuk do të thotë kush është hajduti i vërtetë.
Nëse Shqipëria do të dale nga ky batak, drejtësia duhet t’i japë një përgjigje pyejtes: a jane ta vërteta gjithë këto akuza? Kush ka vjedhur dhe vjedh në këtë vend? Dhe kush do përgjigjet para ligjit për shkeljen e tij? Përderisa këto pyetje nuk marrin përgjigje, prisni të enjten të shihni teatrin e rradhës.
Blendi Fevziu
