Kreu i Komitetit të Çështjeve Europiane të Bundestagut, Günter Krichbaum ka deklaruar se çelja e negociatave për anëtarësim me Shqipërinë po diskutohet në Bundestag dhe nënvizoi faktin se zgjerimi i BE është parë të bëhet më mirë sipas parimit “principle of own merit”, duke nënkuptuar se Maqedonia e Veriut dhe Shqipëria mund të ndahen në procesin e integrimit.
Në një intervistë për Deutche Welle, zyrëtari gjerman tha se mendimi për Maqedoninë Veriore në Bundestag është shumë i mire. Pyetjes se nëse Budestagu do të ndezë dritën jeshile për të dyja vendet ai nuk ju përgjigj drejtpërdrejtë por ajo që ra në sy në përgjigjen e tij ishte fakti se nuk përmendi Shqipërinë.
“Unë mendoj se përpjekjet që po bën Maqedonia Veriore vlerësohen, sepse me Marrëveshjen e Prespës u arrit të zgjidhet një konflikt shumë vjeçar me Greqinë. Ky sukses vlerësohet. Por nuk duhet harruar që vazhdojnë të ekzistojnë sfida të mëdha përpara, si për shembull reforma e sistemit të drejtësisë, ose që ekonomia duhet të zhvillohet në mënyrë që të tërheqë investimet direkte. Dhe shumë fusha të tjera duhen zhvilluar sipër shembull liria e shtypit dhe gazetaria. Të gjitha këto janë fusha që dihen, dhe ku priten përparime. Ne nuk po flasim për pranim në BE këtë vit, por po flasim për fillimin e bisedimeve të pranimit. Ky do të jetë një proces i gjatë, ku duhet patur shumë durim. Por rruga është e qartë, rrugë në drejtim të Bashkimit Europian. Dhe meqenëse pyetët për segmentin kohor, ne do të zhvillojmë në fund të shtatorit diskutimet në Komisionin e parlamentar të Bundestagut që merret me çështjet europiane, përkatësisht do të marrim vendimin në parlamentin gjerman dhe në muajin tetor do të merret vendimi përfundimtar” tha Krichbaum për DW.
Kur u pyet drejtpërdrejtë nëse ekziston mundësia që Shqipëria dhe Maqedonia e Veriut të ndahen në këtë proces ai theksoi se BE e sheh procesin e zgjerimit sipas parimit që secili vend vlerësohet për sukseset e veta.
“Siç thashë ne Bundestagun gjerman jemi duke u këshilluar edhe për Shqipërinë, dhe sa i përket pyetjes suaj për ndarje mund të them se që prej raundit të fundit të zgjerimit të BE, me 10 plus 2 shtete, më 2004 dhe 2007 është parë se është më mirë që vendet të vlerësohen sipas përparimeve që bëjnë vetë, me të ashtuquajturën “principle of own merit”. Prandaj vendet duhen gjykuar për përpjekjet që bëjnë. Për mua është e qartë se mund të bëhet shkëputja e dy vendeve, e megjithatë në fund mund të ndodhë që bisedimet të fillojnë në të njëjtën kohë për të dy vendet. Nuk po flasim për fillimin e bisedimeve për kapitujt e pranimit, se ky është hapi i dytë. Ky principle of own merit, është një princip i BE dhe secili vend vlerësohet për sukseset e veta” deklaroi ai.
Ndërkohë kryeministri Rama njoftoi ditën e sotme se është duke zhvilluar takim pikërisht me Komitetin e Çështjeve Europiane të Bundestagut për të marrë, siç tha ai “PO-në e parlamentit gjerman për Shqipërinë”. /Opinion.al
