Ditën e sotme kreu i SPAK, Arben Kraja ka pasqyruar raportin për kriminalitetin në vendm në mbledhjen e zhvilluar në Komisionin e Ligjeve.
Kraja ka bërë një bilanc të çështjeve që po hetohen nga prokuroria e Posaçme, ndërsa dha detaje për masën e sigurisë të vendosur ndaj një numri të konsiderueshëm personash.
“Më shumë procedime kemi në fushën e korrupsionit. Dua të theksoj se ne kemi bashkëpunuar ndërkombëtarisht, siç parashikon ligji. Në SPAK janë trajtuar 69 kërkesa nga vendet e tjera, 20 prej të cilave kanë qenë të mbartura nga Krimet e Huaja. Numri i lartë i tyre tregon besimin e institucioneve ndërkombëtare tek SPAK. Veprat penale të hetuara bashkë me të huajt kanë qenë ato për trafik të lëndëve narkotike dhe grup i strukturuar kriminal. Po ashtu janë kryer edhe ekstradime me shtete të huaja, 43 gjithsej. Kemi bashkëpunuar edhe me anti-mafien dhe antikrimin në Itali, si dhe autoritetet në Kroaci. Edhe në kuadër të OFL-së, SPAK ka mbrojtur para gjykatës kërkesat për sekuestrim pasurie”, tha Kraja.
Kreu i SPAK, u shpreh se në gjykatë janë pranuar 115 kërkesa të SPAK për sekuestrim pasurie.
“Nga 120 kërkesa për sekuestrim pasurie, 115 janë pranuar. Janë mbi 200 pasuri të paluajtshme të sekuestruara. Është vepruar edhe në kuadër të ligjit anti-mafia, ku janë kryer po ashtu sekuestrim pasurie. Goditja e pasurisë kriminale kanë qenë shumë të efektshme dhe në një periudhë tepër të shkurtër. Janë dënuar 50 persona, pas kërkesës së SPAK. Kemi punuar edhe në drejtim të vendosjes të disa të burgosurve në një regjim të posaçëm. E rëndësishme është që procesi ka qenë ligjor dhe është në monitorim të vazhdueshëm e ka funksionuar. U zgjodh drejtori i BKH-së, me një proces të rregullt e demokratik. Ne kemi punuar në asistencë me autoritetet e huaja, europiane dhe ato amerikane. Gjithashtu kemi pasur asistencë edhe nga EURALIUS. Përfaqësuesit e SPAK kanë raportuar edhe në Ministrinë e Drejtësisë, edhe raportin e GREKOS-s. Ende ka shumë punë për të bërë, por dua të theksoj se tashmë kemi bërë një punë kolosale dhe jemi përpjekur të bëjmë më të mirën”, sqaroi Kraja./ Opinion.al
