Nga Fieri, ku prezantoi kandidatët për deputetë të këtij qarku, kryeministri Edi Rama sulmoi kreun e opozitës Lulzim Basha dhe planin e PD për zgjedhjet e 25 prillit. Kreu i qeverisë tha se oferta për taksë 9% ndikon negativisht tek familjet e thjeshta. Sipas Ramës nuk mund të paguajnë njësoj për shtetin të pasurit dhe punëtorët e tyre.
Më tej, Rama sulmoi edhe koalicionin e PD me LSI, të cilin e cilësoi një kontratë absurde të pa ndodhur më parë mes dy forcave politike teksa theksoi se kreut të PD-së i është noterizuar pengmarrja me këtë marrëveshje.
“Nuk mundet të paguajnë njësoj për shtetin edhe më të pasurit edhe punëtorët e tyre, është e pamundur sepse nuk është njësoj në fakt. Nëse një punëtor paguan 9%, heq paratë që ka për të paguar nevojat mujore të familjes. Nëse një milioner paguan 9% ajo nuk ka asnjë ndikim në të përditshmen e familjes së tij. Mund të ndikojë në numrin e veturave, apo gjatësinë e jahtit apo në numrin e vilave, të metrave katrorë që disponon, por kjo nuk është diçka jetike dhe nuk jemi këtu për të shtuar numrin e vilave të tyre apo për të rritur numrin e veturave të tyre. Nëse duan t’i zgjasin, t’i rrisin, t’i shtojnë janë në të drejtën e tyre, por jo në kurriz të të tjerëve duke paguar detyrimet e shtetit më pak se të tjerët. Ajo që ofrohet nga PD-ja është një përmbysje e plotë e këtij parimi dhe shkuarje komplet në drejtim të kundërt me interesat e atyre që mblidhen me dy gishtat për të shpërndarë Covidin. Të gjithë ata që janë në ato tufat e organizuara gjoja spontane janë viktimat e para të kësaj politike nëse do të presupozonim që PD-ja do të merrte mandatin për të qeverisur, pa llogaritur këtu. Lulzim Basha nuk është Lulzim Basha. Lulzim Basha nuk është një rrezik për demokracinë. Lulzim Basha nuk është një rrezik për drejtësinë por fatkeqësisht mishëron rrezikun që përfaqësojnë ata që e kanë Bashën një manekin të buzëqeshur në duart e tyre, Saliun, Ilirin, Monikën. Lulzim Basha nënshkruan një kontratë absurde të pandodhur më parë mes dy forcave që hyjnë veç e veç dhe bëjnë që më përpara koalicionin paszgjedhor. Për çfarë arsyeje? Thjesht për të noterizuar aktin e pengmarrjes së tij. Është e qartë që rreziku dhe i destabilizimit të procesit zgjedhor për shkak të humbjes që afron gjithnjë e më shumë është prezent. Për këto arsye unë besoj që të gjithë ata që mbështesin verbërisht PD-në dhe që përfaqësojnë ato kategori që ne i mbrojmë me fakte dhe jo me fjalë, shumë më mirë dhe shumë më qëndrueshëm se PD-ja të bëjnë reflektimin e tyre”, tha Rama./Opinion.al
