Pasditen e sotme është mbledhur Këshilli Politik për fazën e dytë të punës, ku do të diskutohen ndryshimet kushtetuese të miratuara në 30 korrik.
Ndërkohë, deputetja Rudina Hajdari ka dalë e para nga mbledhja e Këshillit Politik duke thënë se asgjë nuk është arritur dhe nuk ka pasur dialog mes tyre.
“Bëra një propozim të qartë, përsa i përket ruajtjes së kuotës gjinore, mund të ruajmë listat e hapura duke përdorur një mekanizëm korrektimi që të ruajmë përfaqësimin gjinor. Këshilli Politik ka një problem të vetëm. Rama do të mbajë tepsinë e vetë, kemi Monën që nuk do t’i shqitet Lulit, dhe kemi Lulin që do të mbajë vagonin e partiçkave. Do t’i mbetem deri në fund listave të hapura 100%, dhe do të kërkoj një sqarim për sa i përket votës së diasporës,” u shpreh Hajdari.
Sipas “News24”, përfaqësuesi i mazhorancës në Këshillin Politik, Damian Gjiknuri është shprehur në mbledhje se ndryshimet kushtetuese janë në fuqi, dhe se tashmë mbetet detyrimi që të reflektohen në Kodin Zgjedhor.
Po ashtu Gjiknuri i ka bërë ftesë që deri të premten të sjellin propozimet për pragun kombëtar zgjedhor, afatet e paraqitjes së listës unike nga aleancat dhe si do të kryhet aspekti procedurial i votimit për kandidatët në lista të hapura.
“Ndryshimet kushtetuese tashme jane ne fuqi. I doni apo nuk i doni kjo eshte tjeter ceshtje. Kemi Kushtetuten ne fuqi dhe detyrimin per ta reflektuar ne Kodin Zgjedhor. Ju lutem, ju ftoj qe ne ditet e ardhshme, deri te Premten te sillni propozimet tuaja per: 1) pragun kombetar zgjedhor, 2) afatet e paraqitjes se listes unike nga aleancat dhe 3) si do kryhet aspekti procedurial i votimit per kandidatet ne kushtet e listave te hapura duke ruajtur kuotat gjinore. Nuk duhet humbur kohe. Duhet ti japim bazen ligjore te plote institucioneve qe te pergatisin zgjedhjet. Kerkesa juaj per te kerkuar ne kete faze mendimin e ODIHR eshte e cuditshme kur jeni ju qe na detyruat qe te bejme nje marreveshje ne 5 Qershor e cila binte ne kundershtim me rekomandimin kyç te ODIHR qe ishte depolitizimi i administrates zgjedhore. Atehere nuk donit te pyesnit per ODIHR ndersa tani qenkeni kujtuar ti kerkojme mendim! Ne pranuam ate cka kerkuat ju ne 5 Qershor dhe firmosem bashkarisht pikerisht per te ju plotesuar juve kerkesat. Gjithesesi e kemi firmosur ate marreveshje dhe i kemi qendruar asaj plotesisht.’’- ka thënë Gjiknuri./ Opinion.al
