Genis Mëhillaj i dënuar me 10 vite burg si pjesë e bandës së tritolit në Vlorë doli në gjykatë këtë të enjte për masën e sigurisë. Ai mohoi të ketë kryer porosi vrasjesh apo të ketë gjetur klient për vrasësin me pagesë (të penduar) Julian Sinanaj. Ndërsa prokuroria u shpreh se ka prova të mjaftueshme përfshi dhe dëshminë e bashkëpunëtorit në këtë grup, Julian Sinanaj.
Mëhillaj u arrestua tre ditë më parë, ndërsa procesi ndaj bandës së tritolit ka përfunduar. Ai akuzohet si pjesë e një grupi të strukturuar kriminal që kryente vrasje me pagesë.
“Mëhillaj, kishte rolin e porositësit dhe bashkëpunonte për këtë me kushëririn e tij, Andon Mëhillaj, për kryerjen e vrasjeve”, deklaroi prokuroria.
Grupi kriminal i vrasësve me pagesë u zbulua në prill të vitit 2015, ndërsa ekzekutimin e porosive e kryente Julian Sinanaj.
Genis Mëhillaj është dënuar me 10 vite burg, ndërsa prokuroria kërkoi burgim të përjetshëm.
Sot në sallën e gjyqit ku doli për masën e sigurisë, Mëhillaj hodhi poshtë akuzat dhe kërkoi që procesi të niste nga fillimi.
