Ka qenë një ditë jo e qetë, ajo e kaluar sot në Parkun e Liqenit, ku për të disatën ditë me radhë, aktivistë të shoqërisë civile të mbështetur edhe nga Partia Demokratike, janë përplasur me Policinë e Shtetit, me qëllim moslejimin e ndërtimit nga Bashkia të këndit të lojrave për fëmijë, që është menduar të ndërtohet në brendësi të parkut. Edi Paloka, nënkryetar i Partisë Demokratike, në një prononcim për Opinion.al, tha se arsyeja e vajtjes së deputetëve të PD-së, ishte mbrojtja e ligjit, por ndërkohë u përballën me antiligji
Z.Paloka cili është komenti juaj i parë mbi atë cfarë ndodhi sot në Parkun e Liqenit?
Ideja kryesore ishte se ne shkuam për të mbrojtuar ligjin por ne u përballëm me antiligjin. Ne shkuam për të kundërshtuar një ndërtim antiligjor, por Edi Rama dhe Veliaj na përballën me forcat speciale, policinë e shtetit të cilat nuk ishin aty për të mbrojtur ligjin, por për të zbatuar një urdhër.
Paloka, përse duhet një deputet i juaji të shkojë me pistoletë në brez në një protestë e cila duhet të ishte paqësore?
Kush e tha këtë që Strazimiri ka qenë i armatosur. Unë po ju them që ky është një lajm i rremë. Unë kam qenë pranë me Gent Strazimirin dhe ai është çuditur nga ky lajm. Unë po ju them që Strazimiri nuk ka pasur ka pistoletë. Ai vetë ma tregoi se kishte një kllëf në brez. Sot kundëligjit ishte shteti. Ishin forcat speciale që po mbronin krimin. Policia ka detyrim kushtetues të mbrojë ligjin dhe jo urdhrin e dalë nga Rama dhe Veliaj.
A po i vidhni ju protestën shoqërisë civile?
Çdo të thotë kjo?
Që ju po bëheni protagonistë në një protestë e cila nisi nga shoqëria civile?
Në radhë të parë unë kam qenë aty si qytetar i Tiranës, pasi unë jam rritur në këtë qytet. Dhe kam shkuar aty për të mbrojtur parkun si çdo qytetar. Politikisht aty po ndodh diçka. Ka shkelje të drejtave të njeriut. Duket qartazi padrejtësia e këtij shteti. Një njeri që rregullon taracën e shtëpisë përfundon në biruc, kurse Erion Veliaj që shpenzon 700 milion lekë për të dëmtuar parkun, fle i qetë
Z. Paloka, nëse jeni kaq të gatshëm në protestën te Liqeni, përse nuk jeni po kaq aktiv edhe në mbrojtjen e banorëve e Bulevardit, të cilëve u janë prishur nga banesa?
Absolulisht i kemi mbështetur . Unë vetë kam komunikuar me banorët e stacionit të trenit. Fillimisht kemi pasur problemin se shpresonin te fjala e Erion Veliaj dhe ata na kanë kërkuar të jemi të rezervuar. Por tani që shtëpitë e tyre janë prishur dhe ata gjenden përballë pabesisë së Bashkisë , ata janë kthyer duke kërkuar ndihmën tonë dhe ne jemi në krah të tyre. Dhe po ju them që sot e gjithë Shqipëria është në protestë, në një shtet i cili është dukshëm kundër qytetarëve të tij.
