Publikimi i historisë së një abuzimi seksual ka tronditur sot Kosovën, kur mediat raportuan për një vajzë 16-vjeçare nga fshati Drenas, e cila ishte abuzuar nga mësuesi i saj.
Në momentin që e mitura vendosi ta denonconte ngjarjen në polici, ajo ra viktimë e një tjetër abuzimi. Këtë radhë nga hetuesi Vesel Vesli, i cili pasi e fotografoi të zhveshur e ka detyruar të kryejë marrëdhënie seksuale me të, për një periudhë 2 vjeçare.
Vajza ka mbetur shtatzënë dhe në këto kushte, funksionari i policisë e ka çuar të abortojë në një klinikë në Prishtinë. Por mjeku, që ka kryer abortin jep një tjetër fakt, të ndryshëm nga çfarë raportuan mediat.
Në një intervistë, gjinekologu, Fehmi Ahmeti, thotë se momentin kur vajza ka ardhur në ordinancën e tij, ishte në moshë madhore. “Ajo kur ka ardh ka qene në moshën madhore, dikun 18 vjet e 6 muaj”, shkruan Express.
Ahmeti shton se vajza ka ardhur e vetme dhe nuk ka vërejtur se ka qenë e detyruar nga dikush që të abortojë. Ai thotë se nuk ka ndonjë lidhje me policin nga Drenasi, dhe se ligji ia lejon abortin në këtë moshë. Ndërkaq klinikën e tij e kanë vizituar edhe inspektorati Policor i Kosovës. Mjeku mohon të jetë arrestuar nga policia.
Por ndryshe Inspektoriati Policor i Kosovës ka vepruar me zyrtarin policor Vesel Veseli. Ky i fundit është arrestuar me dyshimin se ka kryer veprat penale “të dhunimit” dhe “keqpërdorimi seksual”.
