“Duhet të ketë një vend të veçantë në ferr për profetët që projektuan Brexit”. Kjo deklaratë e Presidentit të Këshillit Europian Donald Tusk ka shkaktuar jo pak reagim në Britaninë e Madhe, që megjithatë ka vendosur të përgjigjet në mënyrë të moderuar e mbase në një stil tipit anglez.
“I takon Donald Tusk për të vlerësuar nëse gjuha e përdorur është e dobishme”, tha zëdhënësi i Doëning Street duke iu përgjigjur ftohtë deklaratës.
“Referendumi mbi Brexit ishte ushtrimi më i madh i demokracisë në historinë e këtij vendi. Njerëzit votuan për të lënë BE-në dhe qëllimi është të shkojmë në një marrëveshje, në mënyrën më të mire të mundshme për të dyja palët, Britaninë e Madhe dhe Bashkimin Europian”, përfundoi zëdhënësi.
Kujtojmë se dalja e Britanisë së Madhe nga Unioni do të duhet të riorganizojë një sërë procedurash dhe hapash rregullatorë në marrëdhëniet mes vendeve.
Pikërisht lidhur me këtë fakt u shpreh sot Donald Tusk, i cili tha ndër të tjera se, me largimin e planifikuar të Britanisë së Madhe nga Bashkimi Europian më pak se dy muaj larg, të dyja palët duhet të përqendrohen në shmangien e një pamarrëveshjeje kaotike Brexit.
Tusk i bëri këto deklarata gjatë një takimi me kryeministrin irlandez, Leo Varadkar dhe një ditë përpara se kryeministrja britanike Theresa May të shkojë në Bruksel për të diskutuar alternativat për të rregulluar një bllokim në kufirin irlandez.
