Kreu i qeverisë së Kosovës, Ramush Haradinaj ka deklaruar edhe njëherë se nuk ka heqje të taksës për produktet serbe. Kryeministri i Kosovës, u shpreh se taksa nuk është vetëm për çështje tregtie, por edhe kriter për të treguar nëse janë shtet apo jo.
Sipas tij nëse lëshohet pe për taksën para njohjes do të jetë më e vështirë arritja e një marrëveshje në pozicione të barabarta, teksa shtoi se nuk është mirë që Kosova të japë shembuj të dobësimit dhe dorëzimit në etapën finale, pasi sipas tij nëse diçka e tillë ndodh do të rriten kërkesat për një konsensus më të madh dhe për kompromis më të madh.
“Taksa nuk është vetëm taksë, nuk është vetëm tregti, por është edhe ta quajmë edhe kriter se a jemi shtet a jo. Nëse ne lëshojmë pe për taksën para njohjes do ta kemi më të vështirë një marrëveshje në pozicione të barabarta…Mirë është që gjithë rajoni të avancojë drejt BE-së, por Kosova nuk është mirë të japë shembuj të dobësimit, dorëzimit në etapën finale, pasi që nëse jep një shembull të tillë, kërkesat do të rriten për një konsensus më të madh dhe për kompromis më të madh”, tha Haradinaj.
Deklarata e kryeministrit Haradinaj vjen në të njëjtën ditë kur presidenti i Francës, Macron nisi vizitën në Serbi dhe ku mendohet se tema kryesore e bisedimeve me autoritetet serbe do të jetë pikërisht çështja e taksës që autoritetet e Kosovës kanë vendosur ndaj produkteve serbe./Opinion.al
