Jair Bolsonaro është arrestuar nga Policia Federale e Brazilit. Ish-presidenti, i dënuar me 27 vjet e gjashtë muaj burg për tentativë grushti shteti dhe vepra të tjera të rënda, u mor të shtunën në orën 6 të mëngjesit nga banesa e tij në Brasilia, ku ndodhej që nga 4 gushti në arrest shtëpie.
Ka qenë gjykatësi i Gjykatës së Lartë Alexandre de Moraes, kryeprokurori i Bolsonaros, që ka urdhëruar ndalimin e tij në paraburgim — “pa përdorim prangash dhe pa ekspozim publik”. De Moraes e justifikoi vendimin me “rrezikun e arratisjes” së Bolsonaro-s. Byzylyku elektronik që ish-presidenti mban prej korrikut të këtij viti është manipuluar në orët e para të mëngjesit. Moraes pohon se kjo do të ishte shenja e një tentative arratisjeje, ndoshta drejt ambasadës së Shteteve të Bashkuara, duke përfituar nga vigjilja e mbrëmjes së organizuar nga i biri Flavio ndërtesës së apartamentit ku ai jeton.
“Është e rëndësishme të theksohet se apartamenti i të pandehurit ndodhet rreth 13 kilometra nga nga sektori jugor i ambasadave të Brasilia/DF, ku ndodhet ambasada e Shteteve të Bashkuara të Amerikës, në një distancë që mund të përshkohet në rreth 15 minuta me makinë”, theksoi Moraes.
Fillimisht, u supozua se arrestimi lidhej me nevojën për të siguruar rendin publik, menjëherë pasi djali i ish-presidentit, senatori Flavio Bolsonaro, kishte bërë thirrje për mobilizim të mbështetësve të tij për të shtunën në mbrëmje.
Oficerët mbërritën në një konvoj prej të paktën pesë makinash përpara ndërtesës së apartamenteve ku jeton Bolsonaro. Rreth 20 minuta më vonë, ai u dërgua në selinë e Policisë Federale, ku do të mbahet për një kohë të pacaktuar. Sipas disa dëshmitarëve, ish-presidenti shpërtheu në lot ndërsa po nxirrej nga shtëpia e tij.
Një ditë më parë, avokatët e tij i kishin kërkuar Gjykatës së Lartë që ta lejonte të vuante dënimin në arrest shtëpiak, për shkak të moshës së tij të shtyrë (70) dhe problemeve shëndetësore, duke argumentuar se mbajtja në burg do të përbënte një “rrezik për jetën e tij”. “Trump i Tropikëve” u dënua nga Gjykata e Lartë në fund të shtatorit me akuzat për tentativë grushti shteti, krim të organizuar, heqje të dhunshme të sundimit të ligjit, dëmtim të rëndë të trashëgimisë historike dhe përkeqësim të saj. Shtatë nga bashkëpunëtorët e tij u shpallën gjithashtu fajtorë.
Kurrë më parë, Brazili, duke dalë nga një diktaturë brutale njëzetvjeçare vetëm dyzet vjet më parë, nuk ka nxjerrë në gjyq një udhëheqës me akuzën e një grushti shteti. De Moraes, gjykatësi hetues në këtë çështje, e krahasoi ish-presidentin me një bos mafioz dhe deklaroi se “nuk ka dyshim” se ish-presidenti ishte truri dhe udhëheqësi i komplotit, i organizuar edhe para se të humbiste zgjedhjet presidenciale të vitit 2022 ndaj rivalit të tij të krahut të majtë, Luiz Inácio Lula da Silva, madje duke komplotuar vrasjen e tij, si dhe atë të zëvendëspresidentit të tij dhe vetë de Moraes.
Një komplot që kulmoi me turmën bolsonariste që sulmoi ndërtesat qeveritare të Brasilia-s më 8 janar 2023, shtatë ditë pas inaugurimit të Lulës si president.
Avokatët e Bolsonaros kanë apeluar dhe aleatët politikë të udhëheqësit të ekstremit të djathtë po punojnë për të miratuar një projektligj për amnisti në Kongres, të ndihmuar pjesërisht nga presioni i Shtëpisë së Bardhë. Donald Trump kritikoi ashpër vendimin kundër Bolsonaros , duke pretenduar se “kjo është ajo që ata u përpoqën të më bënin dhe dështuan”, dhe e goditi Brazilin me tarifa rekord prej 50% në hakmarrje për atë që ai e quajti një “gjueti shtrigash”, duke njoftuar sanksione kundër de Moraes dhe gjyqtarëve të tjerë.
Megjithatë, që nga shtatori, ai është takuar dy herë, megjithëse shkurt, me Presidentin Lula – “ka kimi të mirë midis nesh”, tha ai – dhe ditët e fundit ai i hoqi tarifat për disa produkte braziliane. Në një intervistë me Corriere, Lula përsëriti se nuk ka ndërmend të falë paraardhësin e tij: “Në Brazil, ne garantojmë respekt për Kushtetutën tonë, e cila përcakton pavarësinë e tre pushteteve. Askush – as unë, si President i Republikës, as askush tjetër – nuk mund ta devijojë një gjykatë nga detyra e saj për të zbatuar ligjin. Pati një përpjekje për grusht shteti në Brazil dhe një komplot për të më vrarë mua, zëvendëspresidentin dhe një gjyqtar të Gjykatës së Lartë. Për herë të parë në 525 vjet histori, një ish-kreu shteti është dënuar për një komplot grushti shteti. Kjo do të shërbejë si shembull në mënyrë që askush të mos guxojë përsëri të sulmojë sundimin demokratik të ligjit në Brazil.” /Corriere della sera
