Kryetari i Partisë Demokratike Lulzim Basha ka qenë sot në Malësi të Madhe ku ka zhvilluar një takim me strukturat e partisë.
Kreu i demokratëve tha në këtë takim se 30 qershori u braktis edhe nga vetë socialistët. Së pari ai ju referua raportit të ODHIR për të argumentuar se “30 qershori nuk ishte për popullin, madje nuk ishte as për PS-në” dhe siç shtoi ai “30 qershori ishte për një grusht njerëzish që sot duhet të ishin në burg, jo në politikë”.
Së dyti Basha identifikoi gjendjen ekonomike si faktor që i shtyu njerëzit të braktisnin zgjedhjet e 30 qershorit. “Njerëzit janë keq për bukën e gojës”, deklaroi ai duke thënë më tej se “Kjo situatë ka një shkaktar dhe një përgjegjës që ka marrë gjithë pasuritë dhe ekonominë e vendit dhe ia ka dorëzuar 5 oligarkëve dhe 5 kriminelëve me të cilët pastron dhe ndan bashkë fitimet”.
Si arsye të tretë për braktisjen e zgjedhjeve, Basha cilësoi rezistencën e opozitës që sipas tij ka arritur dy gjëra: “ka vetëdijësuar shqiptarët dhe u ka vrarë frikën shqiptarëve”
Në fund kreu i opozitës shtoi se Edi Rama është i rrëzuar dhe se objektivi i opozitës mbetet t’i japë vendit një qeveri nëpërmjet zgjedhjeve të lira dhe të ndershme.
“Përgjegjësia jonë tani është ta marrim këtë energji të 30 qershorit dhe ta transformojmë në një energji për ndryshimin e Shqipërisë. Ky është premtimi për shqiptarët, jo thjesht largimi I Edi Ramës. Moralisht dhe politikisht ai është I rrëzuar. Detyra jonë kryesore është që kësaj shumice të 30 qershorit t’i japim formën dhe dimensionet e shumicës qeverisëse nëpërmjet zgjedhjeve të lira e të ndershme që mbeten objektivi kryesor I lëvizjes që filluam së bashku me 16 shkurt” përfundoi Basha. /Opinion.al
