Aktualitet

Grabitja në Rinas, qeveria hedh hapin e parë kundër TIA-s


               Publikuar në : 15:34 - 26/04/19 |
geliano fataj

Nga studio e emisionit Opinion, Ministrja e Infrastrukturës dhe Energjisë, Belinda Balluku paralajmëroi prishjen e kontratës koncesionare me kompaninë China Everbright Limited (TIA), me bazë në Hong Kong, në lidhje me Rinasin. Deklarata u bë pas grabitjes së fundit, ku dyshohet se u morën 6.5 milionë euro.

I kemi lëmë disa detyra për sigurinë, duhen përmbushur, por jo si më parë. Nëse nuk i plotëson atëherë duhet të ndërmarrim masa ekstreme. Do ndërpresim koncesionin, pasi është kërcënuar siguria kombëtare. Kjo është një çështje që fitohet në gjykata, është cenuar imazhi i një vendi në ngritje. Ne kërkojmë të zgjidhim kontratën”, tha ministrja në Opinion.

E siç duket ka ardhur lëvizja e parë. Me një vendim të botuar në Fletoren Zyrtare, qeveria autorizon Avokatin e Shtetit të gjejë një zyre avokatie të huaj për shërbim konsulence në lidhje me koncesionin e Rinasit.

Kështu kontrata e konçesionarit të aeroportit duket se është një hap larg arbitrazhit ndërkombëtar. Kjo studio ligjore avokatie do të monitorojë zbatimin e marrëveshjes mes qeverisë shqiptare dhe TIA-s. Në përfundim të këtij verifikimi do të dalin dhe konkluzionet përkatëse, nëse janë respektuar ose jo kushtet e kontratës. Nëse konkluzionet do të jenë të  favor të qeverisë, kjo e fundit duket se do të ndërmarrë vendimin për ta depozituar këtë konflikt në arbitrazhin ndërkombëtar.

Elton Pikli, i arrestuari i pestë për grabitjen e 6.5 milionë eurove në pistën e Aeroportit të Rinasit, është lënë në burg nga Gjykata e Krimeve të Rënda. 32-vjeçari mbajtur qëndrim mohues para togave të zeza, duke mohuar akuzat e ngritura nga Prokuroria.

I riu nga Kruja ka sqaruar se nuk ka lidhje me grabitjen, por nuk e ka mohuar njohjen me Admir Muratajn, i vrarë në grabitje. Sipas Piklit, ai njihte pak dhe e kishte vite që nuk e kishte takuar. Pavarësisht këtyre pretendimeve, ai është lënë në qeli nga gjykata deri në fund të hetimeve.

Emri i Elton Piklit ka dalë nga dëshmia e të penduarit Alkond Bengasi, si një nga personat që ka pasur dijeni për grabitjen e 9 Prillit në pistën e avionëve. Ndërsa i arrestuari tjetër për këtë ngjarje, Oltion Veseli, dy ditë pasi u la në burg nga Shkalla e Parë e Krimeve të Rënda ka ankimuar vendimin në Apel. 38-vjeçari pretendon se prokuroria nuk ka prova që e implikojnë atë në grabitje dhe kërkon lirimin e menjëhershëm.

Të arrestuar për këtë grabitje janë edhe Renaldo Sula e Saimir Çela. Të gjithë të prangosurit deri tani kanë mohuar akuzat, ndërsa në kërkim janë shpallur dy vëllezërit Klement dhe Eldi Çala./Opinion.al

Pas