Sociale

Gjobë 100 mijë lekë për status denoncues në Facebook


Bëhu pjesë e Grupit Zyrtar të Opinion.al
>> KËTU <<
               Publikuar në : 17:59 - 23/10/18 |
b.f

Gjykata e Tiranës gjeti fajtor për shpifje anëtarin e këshillit Bashkiak të Tiranës Akil Kraja, akuzuar nga kryebashkiaku Erion Veliaj për shpifje. Kraja e konsideroi vendimin skandaloz dhe njoftoi se do ta apelojë.

Një status në rrjetin social Facebook nga ana e një këshilltari të Partisë Demokratike në Këshillin Bashkiak Tiranë u konsiderua si shpifje ndaj kryebashkiakut Erion Veliaj nga Gjykata e Tiranës, bëri të ditur Veliaj si dhe i padituri, Akil Kraja.

Kraja pati denoncuar si “aferë korruptive” rritjen e debatuar të çmimit të furnizimit me ujë të banorëve të Tiranës nga monopoli bashkiak i furnizimit me ujë dhe heqjes së ujërave të zeza, UKT.

“Bashkia e Tiranës nuk po e rrit çmimin e ujit për të përmirësuar furnizimin me ujë. Ajo dështoi me këtë politikë kur rriti çmimin e biletës së autobuzëve”, deklaroi Kraja në 15 nëntor 2017.

“Bashkia e Tiranës po rrit çmimin e ujit si një dhuratë për pronarët e ardhshëm të Ujësjellësit të Tiranës, që do ta privatizojnë këtë kompani publike, me siguri për të ndarë bashkë fitimet me Erjon Veliajn dhe Edi Ramën”, vijon më tej statusi i publikuar edhe në faqen e Facebook të Partisë Demokratike.

Gjykata e Tiranës shpalli vendimin të martën më 23 tetor pas një procesi gjyqësor që zgjati rreth dhjetë muaj. Ajo e gjeti deklaratën shpifëse dhe i akordoi Veliajt një dëmshpërblim në masën 100 mijë lekë. Kraja detyrohet të paguajë edhe shpenzimet gjyqësore.

Në një status në Twitter, Veliaj u shpreh i lumtur duke deklaruar se të ardhurat nga gjyqi do t’i shpenzojë për të financuar blerjen e dy kompjuterëve për një shkollë “në Kodër Kamëz”.

“Shkolla në Kodër Kamëz do të ketë nesër dy kompjutera të rinj”, deklaroi ai.

Kryeministri Edi Rama shkoi më tutje duke deklaruar gjithashtu në Twitter se ai ka gati 12 padi të tjera për shpifje si dhe disa dyzina në përgatitje.

Kraja i tha BIRN se vendimi i gjykatës ishte “skandaloz” dhe se ai do ta apelonte atë.

Enti Rregullator i Ujit miratoi vitin e kaluar përmes debateve rritjen e tarifave për Tiranën me 44%, një vendim i debatuar jo vetëm nga opozita dhe media, por edhe nga Autoriteti i Konkurrencës, i cili arsyetoi se rritja përbën një abuzim me pozicionin monopol të UKT në këtë treg. Autoriteti e konsideroi rritjen e çmimit si të pajustifikuar dhe të pabazuar në logjikë të shëndoshë ekonomike.

Paditë civile ose penale për shpifje janë përdorur shpesh nga palët politike shqiptare kundër njëra-tjetrës. Në kohën kur Partia Socialiste ishte në opozitë, personazhe të ndryshme të qeverisë së Partisë Demokratike apo familjarë të ish-kryeministrit Sali Berisha ngritën padi të shumta civile kundër eksponentëve të opozitës, të cilët u dënuan për shpifje me dëmshpërblime prej miliona lekësh.

Palët duket se kanë ndryshuar role, pasi tani janë socialistët që pëlqejnë të ngrenë padi për shpifje ndaj demokratëve.

Gjyqet për shpifje, ashtu si edhe gjyqet e tjera zakonisht zgjasin për vite me rradhë nëpër gjykatat shqiptare.

Një rishikim i disa vendimeve gjyqësore për shpifje të Gjykatës së Lartë nga BIRN gjeti se në shumicën dërrmuese të rasteve, Gjykata e Lartë i ka dhënë të drejtë palëve në pushtet kundrejt politikanëve në opozitë./Burimi:BIRN- Gjergj Erebara

Pas