Gazetari i të përditshmes gjermane “Bild”, Peter Tiede, i cili pak ditë më parë publikoi një artikull, ku shprehej se kriminaliteti në Shqipëri ka lidhje të forta me politikën, ka sqaruar përsëri se si ai arriti të ndërtoj shkrimin e tij.
Tiede shprehet se ai ka investiguar vetë në Shqipëri dhe ato që janë publikuar në artikull janë rezultat i informacioneve që ai ka mundur të mbledhë.
Po ashtu, gazetari gjerman, shpjegon se për të realizuar artikullin ai ka intervistuar dhe policë të cilët janë larguar nga Shqipëria dhe kanë marrë azil politik.
Peter Tiede, pranon gjithashtu se është takuar me ish-ministrin Ylli Manjanin, por sipas tij, ai thjesht ka folur për situatën në përgjithësi në vend, pasi shkrimi është produkt i informacioneve të grumbulluara gjatë një jave qëndrimi në Shqipëri.
Po ashtu, autori i shkrimit në “Bild”, i quan qesharake akuzat se ai mund të ketë marrë para për të bërë një artikull ku përmendej krimi dhe qeveria shqiptare.
“Natyrsht që jo ishte një artikull i vogël për raportet tona mediatike. Merrem me pjesë më të mëdha për dokumentarë. Ky artikull nuk ishte pjesë e një dokumentari.
Kam qenë disa herë në Shqipëri. Kam qenë në Greqi dhe vende të tjera. Kam qenë një javë në Shqipëri, kam takuar njerëz më kanë dhënë informacion dhe më kanë dhënë përshtypje se çfarë ka ndodh në Shqipëri. Janë njerëz që nuk preferojnë të flasin në Shqipëri. Kryesisht janë disa policë që i kanë ikur burgimit apo arrestit, apo policë që kanë qenë në arrest shtëpie. Kanë kërkuar azil politik jashtë vendit dhe mbrohen. Ata flasin si për qeverinë si për opozitën.
E kam takuar zotin Manjani por nuk ka qenë ai që ka zgjidhur gjithë problatmikën e përshkruar. Unë kam shëtitur thuajse gjithë Shqipërinë. Vetëm në fund e kam takuar z.Manjani, kemi biseduar për atë që ndodh në Shqipëri, sepse ai ka qenë në qeveri. Pretendimi se mund të kem marrë para është qesharake. Unë kam punuar për gazeta dhe revista të njohura, jam gazetar i njohur në Gjermani. Kam dëgjuar që ka gazetarë që marrin para për artikuj, por jo në rastin tim”, deklaroi gazetari gjerman Tiede.
Kujtojmë që, eksponent të qeverisë dhe vet kryeministri Edi Rama janë shprehur se gazetari ka pasur burim kryesor Ylli Manjanin, i cili ka hedhur akuza për të intimiduar qeverinë në një media të huaj./ Opinion.al E.Xh.
