Aktivitetet që po organizon LGBT nëpër gjimnazet e Tiranës me nxënësit e këtyre shkollave kundër bullizmit dhe paragjykimeve janë kthyer në temë debati në rrjetet sociale. Të shumta kanë qenë reagimet kundër kësaj nisme, nga media por edhe nga figura politike si Ylli Manjani, Tritan Shehu, apo Mesila Doda. Opinion.al ditën e djeshme kontaktoi Ministrinë e Arsimit për të marrë më shumë informacione në lidhje me këto aktivitete. Në një reagim zyrtar, zëdhënësi i kësaj Ministrie ka mohuar që të ketë dijeni për këto takime dhe është shprehur se Ministria e Arsimit nuk ka një projekt me LGBT që të shtrihet nëpër shkollat e Tiranës.
“Ne nuk kemi nje projekt se bashku me kete komunitet qe shtrihet ne shkollat tona. Mund te jene raste te izoluara ku kjo gje behet ne shkolle.” është shprehur zëdhënësi i kësaj ministrie për Opinion.al.
Ditën e sotme Aleanca LGBT në një reagim zyrtar ka akuzuar Ministrinë e Arsimit se po distancohet nga kjo nismë duke insistuar se në fakt këto aktivitete po zhvillohen me dijeninë e plotë të këtij institucioni dhe me lejen e qeverisë shqiptare.
“Çfarë na shqetëson në këtë histori është fakti se si Ministria e Arsimit refuzon të marrë anën e saj dhe përpiqet me çdo kusht të tërhiqet nga debati, ndonëse është në fakt institucioni kryesor për zbatimin e Planit Kombëtar të Masave për luftën ndaj diskriminimit të LGBT sanksionuar me vendimin e Këshillit të Ministrave nr. 390, datë 25.5.2016 .
I kujtojmë Ministrisë së Arsimit se ne nuk hyjmë as natën e as vjedhurazi nëpër shkolla, por këto takime zhvillohen në kuadër të Planit Kombëtar të Veprimit për Personat LGBTI në Shqipëri, strategji e miratuar nga qeveria shqiptare në qershor 2016. Qëndrimet mohuese të MAS në këtë rast tregojnë edhe njëherë se qeveria ka dështuar të përmbushë angazhimet që vetë ka ndërmarrë që prej dy vitesh.
Ministria e Arsimit Sportit dhe Rinisë është një ndër institucionet kryesore përgjegjëse për implementimin e këtij plani i cili përfshin aktivitete edukuese dhe ndërgjegjësuese më drejtues, mësues, psikologë shkollash dhe nxënës.”, shkruhet në reagimin zyrtar të LGBT-së.
Natyrshëm lind pyetja, kush gënjen në këtë mes? Kujtojmë se për këto projekte nuk ka pasur një transparencë për prindërit të cilët janë shprehur kundër kësaj nisme. Opinion.al ka kontaktuar disa prindër të cilët nuk ishin dakort që fëmijët e tyre të ekspozoheshin kundrejt këtyre aktiviteteve./Opinion.al
