Rreth 45,000 fëmijë që kanë lindur gjatë udhëheqjes së grupit militant, ISIS, janë përjashtuar nga shoqëria irakiane, pasi autoritetet nuk u kanë dhënë dokumente të identifikimit, deklaroi grupi ndërkombëtar bamirës, Këshilli Norvegjez i Refugjatëve.
Në një raport të titulluar “Pengesat nga Lindja” ky grup ka pohuar se qeveria irakiane i konsideron certifikatat e tyre të lindjes të pavlefshme pasi ato janë lëshuar nga pjesëtarët e ISIS.
Ky raport ka cituar zyrtarët shëndetësorë, të cilët kanë thënë se pa certifikatë të vlefshme, fëmijët nuk do të mund të vaksinohen, fakt ky që nxit frikën për shpërndarje të sëmundjeve. Përveç kësaj, ata nuk do të kenë qasje në shkollim, dhe kur të rriten rrezikohet të mos iu njihen martesat, pronësitë dhe madje edhe të mos punësohen, por mbi të gjitha nuk kanë identitete.
Shumica e fëmijëve kanë lindur gjatë viteve 2013-2017, kur grupi ekstremist kontrollonte pothuajse një të tretën e Irakut, ndërsa pjesa tjetër ka humbur dokumentet teksa kanë qenë duke u larguar nga konflikti.
“Lejimi i këtyre fëmijëve që të kenë edukim, sigurim shëndetësor, dhe të drejtën për të ekzistuar, është çelësi i sigurimit të ardhmes së qëndrueshme për ata dhe shtetin. Fëmijët nuk janë përgjegjës për krimet e kryera nga të afërmit e tyre, dhe pavarësisht kësaj atyre janë duke u mohuar të drejtat bazike si qytetarë irakianë”,”ka thënë Sekretari i Këshillit Norvegjez të Refugjatëve, Jan Egeland./Opinion.al
