-Nga Manjola Bregasi-
Pas pas mbylljes zyrtare të procesit zgjedhor dhe publikimit të Exit Polleve, përfaqësuesit politikë në vend, patën komunikimet e para në publik.
Fillimisht drejtuesja e LSI Monika Kryemadhi, u shpreh për një fitore të jashtëzakonshme të opozitës, ndërsa tha se LSI kishte siguruar 28-30 mandate, pavarësisht faktit se në Exit Poll-e, kjo forcë arrin 6-8 mandate.
“Numrat që janë tregojnë për një fitore të jashtëzakonshme të opozitës, opozita e bashkuar ka 85-90 mandate. 28-30 mandate ka LSI, PD del forcë e parë”, tha Kryemadhi.
Ndërkohë, më i ftohtë Kryetari i PS Rama preferoi të mos japë deklarata lidhur mbi fituesin, ndërsa tha se sondazhet dhe Exit Poll-et i prëkasin parashikimeve para ndeshjes.
“Sondazhet dhe Exit Poll-et parvarësisht që na japin forcë qeverisëse i përkasin parashikimeve para ndeshjes. Tani mbetet rezultati i kutive të votimit qe është rezultati i ndeshjes. Ndaj ju lutem shumë përqendrohuni të gjithë. Dua të përsëris edhe njëhere një falënderim nga zemra për të gjitha patronazhistët që kanë bërë një punë mbreslënëse dhe janë ata apo ato qe e dinë mirë kush ka votuar dhe kush nuk ka votuar”, tha Rama.
Në një tjetër atmosferë ishte në daljen e tij përpara selisë së partisë, kryedemokrati Basha. I mbështetur nga thirrjet entuziaste të simpatizantëve, Basha deklaroi me bindje fitoren. “Faleminderit të gjithë qytetarëve shqiptarë, që zgjodhën ndryshimin,. Kjo është një fitore e qartë për popullin shqiptar, një fitore e qartë për aleancën për ndryshim. Vullneti i popullit është në kutitë e votimit. Kam besim të plotë se numëruesit dhe komisionerët do ta përmbyllin këtë proces sipas ligjit. Në fund të këtij procesi Shqipëria fiton”, tha Basha.
Por këtij entuziazmi, ju përgjigj pak minuta më pas drejtuesi politik i qarkut të Tiranës në PS, Erion Veliaj.
Gjithashtu Veliaj foli për projeksione dhe Exit Poll-e që i japin PS-së më shumë se 72 mandate, por ai kërkoi durim deri në numërimin e votave në kuti.
“Faleminderit shumë, ka qenë një ditë e gjatë, e bukur, frytdhënëse. Lajmi i parë i mirë që morëm është që të gjitha exit pollet na kanë nxjerrë fitues në republikë me 71-72 mandate. Lajmi i dytë më i mirë është që projeksionet tona si në Tiranë dhe në Shqipëri janë më shumë se 72 mandate. Por, si projeksionet ashtu dhe Exit Pollet duhet të presin procesin e numërimit. Të tregojmë durim që fitorja në kutitë e votimit të numërohet”, tha Veliaj.
Në kushtet ku të gjithë shfaqen entuziastë e ku të gjithë janë njëkohësisht të pasigurt, ajo që analistët e zgjedhjeve dhe të shifrave japin me siguri, është që palët do të ndahen në kutitë e votimit, nga një diferencë shumë e ngushtë./Opinion.al
