Kronikë

Dhunoi mjekun roje, çfarë ndodhi dje në Urgjencën e Infektivit


               Publikuar në : 11:41 - 11/02/19 |
d.l

Policia e Tiranës ka shpallur në kërkim shtetasin i cili ditën e djeshme goditi në krye të detyrës, një nga mjekët roje në Spitalin Infektiv në QSUT.

Policia njofton se ka nisur procedimin penal ndaj 45 vjeçarit, A.M, i cili ditën e dielë goditi me grusht në ambientet e këtij spitali mjekun roje të urgjencës.

“Nga ana e Specialistëve për Hetimin e Krimit në Komisariatin e Policisë nr. 4,  filloi procedimi penal për veprën penale “Goditje për shkak të detyrës”,  në ngarkim të shtetasit A.M, 45 vjeç, banues në Tiranë. Ky shtetas rreth orës 13:30, të datës 10.02.2019, pasi ka shkuar për të vizituar një të afërmin e tij që ndodhej  i shtruar në  spital, në ambientet e urgjencës së Spitalit Infektiv, ka goditur me grusht për shkak të detyrës, mjekun e urgjencës. Shërbimet e Komisariatit të Policisë nr.4, pasi kanë marrë njoftim kanë shkuar menjëherë në ambientet e urgjencës ku dhe kanë kryer të gjitha veprimet proceduriale.

Shtetasi A. M., pasi kishte goditur mjekun ishte larguar nga spitali dhe po vijon puna nga ana e Policisë për gjetjen dhe ndalimin e tij.”, thuhet në komunikatë.

Më herët akti i dhunimit të mjekut u dënua edhe nga drejtoria e Qendrës Spitalore, që i kërkoi organeve kompetente të vinin para drejtësisë autorin.

Ndërkohë që ministrja e Shëndetësisë, Ogerta Manastirliu, kërkoi që në Kodin Penal të ketë ndryshime përsa i përket sanksioneve ligjore, ndaj dhunuesve të mjekëve. DL

Pas