Kryeministri, Edi Rama ka reaguar pas deklaratës dhe faljes së kërkuar nga deputeti i PD, Xhelal Mziu.
Përmes një statusi në rrjetet sociale Rama shkruan se ndjesa e Mziut nuk vlen asnjë qindarkë teksa thekson se ai është subjekt i drejtësisë penale.
Sipas kreut të qeverisë, populli duhet t’u tregojë këtyre gangove me kravata dhe atyre që janë armatosur për të sjellë ndryshimin, se Shqipëria dhe shqiptarët nuk kthehen më mbrapsht.
“Ndjesa e këtij trogloditi nuk vlen asnjë qindarkë! Ky është një subjekt i vetëdeklaruar i drejtësisë penale, ndërsa kjo soj politike duhet të jetë subjekt i drejtësisë popullore në 25 prill! Kush vjen në pushtet duke vrarë, dhunuar e kërcënuar edhe pushtetin e ushtron duke vrarë, dhunuar e kërcënuar! Populli duhet t’u tregojë këtyre gangove me kravata dhe atyre që janë armatosur për të sjellë ndryshimin së prapthi në Shqipëri, se Shqipëria dhe shqiptarët nuk kthehen më mbrapsht! Në 25 prill votohet për fëmijët që s’kanë të drejtë vote, por që asnjë borxh nuk u kanë prindërve të tyre kthimin e reve të zeza të së shkuarës mbi kokat e tyre! Shqiptarë e shqiptare kudo që jeni! Tregojeni me votën tuaj, forcën e madhe të karakterit që Shqipëria kërkon sot prej të gjithë ne, në rrugën drejt majës ku duhet të vazhdojmë të ngjitemi, për ta bërë Shqipërinë zonjën që Zoti deshi, kur i fali bujarisht bukuritë e saj përrallore.”, shkruan Rama.
Kandidati i PD për deputet në Dibër, Xhelal Mziu iu ka bërë thirrje qytetarëve ditën e djeshme që të njoftojnë çdo rast të tentativës së blerjes së votës, ndërsa paralajmëroi se do e pësojnë “si ai i Elbasanit” për ata që tentojnë të korruptojnë, duke iu referuar ngjarjes së ndoshur në këtë qytet ku mbeti i vrarë, Pjerin Xhuvani. Ndërkohë, mëngjesin e sotëm ai kërkoi falje. Mziu përmes një deklarate për mediat tha se mbështet zgjedhje të lira e të ndershme teksa theksoi se komenti i tij ka ardhur për shkak të emocioneve të forta të momentit./Opinion.al
