Lara Colturi, e cila përfaqësonte Shqipërinë, është shpallur kampione bote për të rejat në ski, në Botërorin që po zhvillohet në Austri.
Kryeministri Edi Rama me anë të një postimi në rrjetet sociale ka shprehur mirënjohje për vajzën italiane. Kreu i qeverisë shkruan se Colturi është natyralizuar shqiptare për shkak të dashurisë së saj për Shqipërinë.
“Lara Colturi, e cila u natyralizua shqiptare sepse familjarisht është e dashuruar me Shqipërinë, sapo është shpallur kampione e botës për të reja në Ski. Kur më tregoi me pasion se pse donte të bëhej shqiptare, e mbylli me fjalën, “Dua t’i sjell Shqipërisë medalje të arta” dhe sot Lara i solli vendit tonë medaljen e parë të artë në ski”,-shkruan Rama.
Lara Colturi u shpall kampione bote për të reja në displinën e super gjigandit duke arritur një sukses të jashtëzakonshëm. Colturi preku shpejtësinë 120 kilometra në orë. Ajo ka marrë pjesë edhe në cirkutin e Kupës së Botës, aktiviteti më i rëndësishëm i sportit të skive, ku është përfshirë edhe mes 30 më të mirave./Opinion.al
