Presidenti i vendit Ilir Meta, ashtu siç edhe kishte paralajmëruar dërgoi në Gjykatën Kushtetuese, vendimin e Këshillit të Ministrave “Për kalimin në pronësi të Bashkisë së Tiranë, truallin e Teatrit Kombëtar.
Ndërsa e ka cilësuar këtë akt, si të papajtueshëm me Kushtetutën, Meta tha ndër të tjera se ky objekt duke qenë se është i konsideruar kombëtar, nuk mund të jetë në juridiksionin e Bashkisë.
Por nga ana tjetër, duke ju referuar vendimit, Meta ja delegoi të gjithë përgjegjësinë e këtij vendimi qeverisë, duke cilësuar se bashkisë i mbetet vetëm ta vendosi në ekzekutim.
“Qëllimi për shkatërrimin e godinave aktuale të kompleksit të Teatrit Kombëtar është vendosur dhe urdhëruar në mënyrë të detyruar nga Këshilli i Ministrave, ndërkohë që kryetari i Bashkisë Tiranë dhe Këshilli Bashkiak, mbetet vetëm që ta vendosin në ekzekutim këtë vullnet politik të Qeverisë dhe Kryeministrit”, tha Meta.
Duket se në këtë artikulim, Meta përjashtoi indirekt nga përgjegjësia kryetarin Veliaj, duke e cilësuar vendimin “vullnet politik të qeverisë shqiptare”.
Por nga ana tjetër, presidenti la sot të paadresuar një përcaktim të tij, kur foli për “ndonjë karagjoz që kërkon të bëjë prova force me presidentin”, duke i lënë kështu vend pikëpyetjes: Për kë e kishte fjalën?
Kjo frazë e presidentit erdhi në fakt pas dy pyetjeve të një gazetari, të cilat Meta duket se i shkriu së bashku, pa lënë të qartë të kuptohet se kujt ju drejtua mesazhi i tij, ndërsa tha se presidenti i mban të gjitha shënim.
“Pavarësisht dy padive në kushtetuese dhe një tjetër në SPAK, duket se mazhoranca dhe bashkia janë të vendosur, pasi nesër mblidhet këshilli. A do të jeni ju me qytetarët dhe artistët në shesh për të mbrojtur teatrin? Dhe një pyetje lidhur me Gjykatën Kushtetuese. Keni kërkuar ndërprerjen e mandatit të anëtarit Dvorani. Cila do të jetë rruga që do të ndiqet nëse Euralius dhe USAID do të jenë kundër kërkëesës suaj?”, pyeti gazetari gjatë daljes së presidentit për mediat.
“Çështja për të cilën unë kam dalë këtu është e një rëndësie të veçantë. Nuk është çështje procedurash, është çështje e nivelit kushetues dhe askush nuk mund të fshihet pas procedurave për shkelje te vetëdijshme dhe të qëllimshme të kushetutës, të cilët cënojnë një interes të përbashkët të gjithë qytetrarëve të Republikës dhe të gjithë shqiptarëve kudo në botë, që ka të bëjë më nje interes kombëtar. Përsa i takon asaj se ku do të jetë presidenti, presidenti është në krye të detyrës, në mbrojtjeje të kushtetutës dhe do të jetë gjithmonë në krye të detyrës. Përsa i takon ndonjë karagjozi që kërkon të bëjë prova force me presidentin apo këdo tjetër, duhet ta kenë të qartë që preseidenti sillet me përgjegjësi maksimale, mban shënim çdo gjë. I ka bërë paralajmërimet të përsëritura”, u shpreh Meta, pa lënë të qartë se cili ishte karagjozi, për të cilin presidenti po mbante shënime. /Opinion.al
