Nga Desada Metaj
Kam një vlerësim shumë të lartë për zonjën e kryeministrit. Jo vetëm për profilin e ulët që ajo mban në publik, por dhe për distancën që Linda Rama krijoi që në fillim me politikën dhe median në përgjithësi. Si një grua e martuar me një politikan që ka parë, dëgjuar dhe deklaruar shumë për miq dhe armiq, ajo nuk u përfshi asnjëherë në debate ku jo rastësisht kundërshtarët politikë edhe tentuan t’a përfshijnë. Këtë përshtypje e pata deri dje, kur media publikoi një fjalim të zonjës Rama ku ndër të tjera kishte kritika “të ëmbla” për qeverinë dhe “shuplaka” për politikën në përgjithësi dhe median.
E ndodhur në një darkë private me zonja të gazetarisë, një traditë vërtet e bukur dhe e mbajtur me kujdes larg vëmendjes së medias, këtë vit Linda Rama, ndryshe nga çdo herë tjetër lexoi dhe nje fjalim të shkruar me kujdes, ku nuk mungonin citimet dhe nga një prej shkrimtarëve të dashur të burrit të saj, Milan Kunderës. Një fjalim, ku ajo tregonte bezdisjen nga debatet (sipas saj të stisura dhe banale) të medias. Dhe e lexoi këtë në një darkë ku veç atyre që drejtojnë spektaklet që i pëlqejnë zonjës dhe kryeministrit, ka dhe gazetare që ftojnë apo shkojnë në çdo studio televizive.
Ç’ta ketë shtyrë zonjën Rama të jetë kaq kritike në këto momente? Mendimet dhe opinionet e saj, apo thjesht nje strategji e re për marrëdhëniet me publikun e stisur në momentet e vështira të qeverisjes nga bashkëshorti i saj? Në respekt të diskrecionit të saj gjatë kësaj kohe, çdo pyetje që mund t’i drejtohej asaj për punët e Edi Rames do më dukej i pavend. Por në kohën kur zonja Rama heq petkun e Lindës dhe vesh atë të gruas së shefit të qeverisë që mendon se problemi janë kritikët e qeverisë, me të drejtë më lind një pyetje. Çfarë mendon zonja Rama për fjalorin e burrit të saj në parlament, ndërsa në fjalimin qe e publikoi dhe në media shkruante :
“Mua më vret gjithnjë e më shumë, rendja gjithnjë edhe më tepër e medias drejt përplasjeve kaq shpesh të stisura e kaq përgjithësisht banale në skenën politike. Më vret si diçka që më dhunon syrin, veshët, por edhe inteligjencën; një lloj force e dobësisë njerëzore që të merr peng dhe të shkëput nga konteksti dhe realiteti ku jeton. Kam ndjesinë gërryese që tanimë kjo është kthyer në një sëmundje, që i ngjan një loje, por që në fakt dëmton përditë rrugët tona të të menduarit dhe gjykuarit”
A e ndjek zonja Rama parlamentin e së enjtes dhe a ka dëgjuar ndonjëherë shprehjet banale që i përdor dhe bashkëshorti? Nëse jo, ja ku është një video e shkurtër, një nga qindra herët kur parlamenti degradon në shfaqjen më banale të mundshme të një shoqërie.
http://youtu.be/KKtK1WVVG60
