Ambasadori i OSBE në Shqipëri, Bernd Borchardt ka kritikuar sërish opozitën shqiptare. Ai sjellë në vëmendje protestën e studentëve të cilën e ka konsideruar një shembull për tu marrë në konsideratë. (SHKRIMIN E PLOTÊ E LEXONI KÊTU)
“Në fund të vitit të kaluar, të rinjtë fituan respekt të gjerë për fushatën e tyre të gjatë dhe vërtet kombëtare për standarde dhe kushte në arsim. Ky ishte idealizëm ndërthurur me vendosmëri, radikalizëm ndërthurur me respekt. Ka një ndryshim të qartë mes një fushate të vazhdueshme protestash paqësore, aktive, të sinqerta e vërtet popullore dhe një numri relativisht të vogël njerëzish, që sulmojnë policinë me kokteje Molotovi dhe dëmtojnë pronën publike dhe private.”
Duke shfrytëzuar një takim vjetor të të rinjve nga i gjithë rajoni, Borchard është shprehur se qeveria shqiptare ka nevojë për opozitë demokratike më serioze dhe më efektive.
“Të rinjtë e angazhuar janë një element i fuqishëm i një shoqërie civile, që duhet të ketë një rol unik dhe jetik në mbikëqyrjen dhe përmirësimin e shëndetit të demokracisë në Shqipëri. Demokracia është më e mirë nëse qeveria kontrollohet dhe sfidohet vazhdimisht nga një ekip i plotë lojtarësh legjitimë: organizata dhe aktivistë të shoqërisë civile; media vërtet të lirë dhe dinamike; institucione të pavarura apo komisione parlamentare.”
Por pas këtyre deklaratave ka pasur dhe një reagim nga PD.
Sekretari i Përgjithshëm i Partisë Demokratike, Gazmend Bardhi iu është drejtuar ish-deputetëve të selisë blu me një mesazh, ku u kërkon të mos komentojnë asnjë fjalë mbi deklaratat e shefit të prezencës së OSBE-së në Shqipëri, Borchardt. Sipas tij, beteja e opozitës është me kryeministrin Edi Rama dhe me bandën që e rrethon.
“Asnjë koment për deklarata e Borchard. Është diversion i pastër për të larguar vëmendjen nga kriza politike dhe shkaqet e saj. Beteja jonë nuk është as me Borchard dhe as me Spiropalin. Por me Edi Ramën dhe bandën në pushtet”- shkruhet në mesazhin e sekretarit të PD-së, drejtuar ish-deputetëve./ Opinion.al
