Muaji gusht ka qenë muaj kalvari për të gjithë ata që kanë bërë porosi (blerje) online. Kur vlera e mallit i kalon 22 eurot, qytetarët duhet të paguajnë TVSH-në. Pikërisht kjo taksë e re e e vendosur nga Qeveria në Korrik shkaktoi jo vetëm dëm në xhepin personal të gjithësecilit prej nesh, por edhe shumë stres e mundim për terheqjen e pakove në postë. Burokracitë s’kanë fund. Qytetarët janë të detyruar të shkojnë në qendrën tranzitore të Postës Shqiptare për të marrë mandatin, më pas në bankë për të bërë pagesën, dhe për tu kthyer sërish në këtë qendër për të tërhequr pakon.
Por nga sot, Posta Shqiptare njofton se do të aplikojë një procedurë të re. Ajo thotë se qytetarët duhet të shkojnë në zyrën qendrore postare të qytetit ku jetojnë, për të kryer procedurat e zhdoganimit dhe për të tërhequr direkt kolipostën. Aty bëhet plotësimi i deklaratës doganore elektronikisht dhe arkëtimi i detyrimit doganor pranë këtyre zyrave. Dhe ky shërbim ka një tarifë shtesë prej 100 lekësh për çdo pako.
Por a është kjo zgjidhja? Posta jo vetëm që kërkon të vjelë ca para më shumë, por për këtë shërbim ka lënë vetëm një zyrë në çdo qytet, ç’ka pritet të krijojë sërish radhë të gjata, sidomos në Tiranë, ku numri i popullsisë është më i lartë.
Vendimi i qeverisë për taksimin e të gjitha blerjeve online me vlerë 22 euro e lart solli pakënaqësi të mëdha në radhët e qytetarëve. Gjithashtu ku vendim nuk u shoqërua me modalitetet përkatëse, ç’ka vazhdon të krijojë probleme për shumë qytetarë që porosisin produkte përmes internetit.
