Autoriteti i Mbikëqyrjes Financiare është institucioni shtetëror i ngritur pikërisht për të mbrojtur konsumatorin. Ligjërisht AMF duhet të përgjigjet për veprimtarinë e tregut të sigurimeve, letrave me vlerë dhe të gjitha veprimtarive të tjera financiare jobankare.
Por në rastin konkret, kur kompanitë e sigurimeve rritën në mënyrë unanime, me marrëveshje të fshehta çmimet, me justifikimin se janë rritur aksidentet pse AMF nuk ndërhyn në rregullimin e këtij tregu dhe mbrojtjen e konsumatorëve?
Vetë ky institucion pranon se nga data 23 gusht tarifat e primit të sigurimit të policave kanë pësuar rritje. Rritja në total është 20 përqind, prej të cilës 13 për qind për llogari të kompanive dhe 7 për qind si pasojë e rritjes së taksës nga shteti.
Aksidentet
Arsyeja kryesore që motivoi rritjen e primit të sigurimit të detyrueshëm motorrik ishte rritja e shpenzimeve për dëme. Sipas të dhënave nga Autoriteti i Mbikëqyrjes Financiare, për 7-mujorin 2015, dëmet e paguara nga kompanitë e sigurimeve për kategorinë e përgjegjësisë së brendshme motorrike ndaj palëve të treta janë rritur me rreth 25%.
Kjo e ka rritur raportin mes dëmeve dhe primeve, për produktin në fjalë, në 26%, nga afërsisht 21% që kishte qenë për të njëjtën periudhë të vitit të kaluar.
Raporti me vendet e BE
Por nëse në Shqipëri ka një rritje të raportit mes dëmeve dhe primeve, kjo shifër është tepër e ulët krahasuar me të gjitha vendet e tjera të Europës.
Televizioni ekonomik ‘Scan’ ka bërë një krahasim mes Shqipërisë dhe shteteve të tjera ku rezulton se vendet e rajonit, pa përjashtim, në vitet e fundit e kanë raportin mes dëmeve dhe primeve për produktin e sigurimit të detyrueshëm motorrik sipër nivelit të 40%.
Fitimet e kompanive shqiptare
Ndërkohë, pare më gjerë, kompanitë e sigurimeve në Shqipëri, përgjithësisht rezultojnë fitimprurëse, mbështetur në të dhënat e vitit të kaluar.
Nga tetë kompani të sigurimeve në tregun e jo-jetës, pesë prej tyre e mbyllën vitin 2015 me fitim. Fitimet neto më të larta i raportuan Sigal, Atlantik dhe Albsig, të gjitha sipër vlerës së 100 milionë lekëve, raporton Scan.
Rezultat fitimprurës arritën edhe Ansig dhe Intersig. Me humbje për vitin 2015 rezultuan kompanitë Eurosig, Insig dhe Sigma Interalbanian Vienna Insurance Group. Sidoqoftë, për kompanitë Insig dhe Eurosig, rezultati i referohet bilancit të konsoliduar, që përfshin edhe kompanitë e tyre jashtë Shqipërisë.
Eurosig ka aktivitet edhe në Kosovë, ndërsa Insig në Kosovë dhe Maqedoni. Sidomos në rastin e Insig, një ndikim të konsiderueshëm në rezultat ka dhënë pikërisht aktiviteti jashtë Shqipërisë. /Opinion.al
*Në foto, Enkeleda Shehi, kryetare e AMF
