Ditën e sotme Komisioni i Posaçëm i Apelimit shkarkoi nga detyra Besnik Muçin, anëtarin e Gjykatës Kushtetuese, i cili u emërua nga Presidenti Meta pak ditë më parë.
KPA u shpreh se Muçi nuk justifikon pasurinë që ai dhe bashkëshortja e tij zotërojnë, po ashtu, theksohet se nuk justifikohen as shpenzimet e viteve 2003-2006.
Pas shkarkimit, Besnik Muçi është shprehur në një dalje për mediat, se nuk është dakord me këtë vendim dhe se ai i është përmbajtur çdo ligji dhe ka bërë deklarimet e nevojshme.
Muçi është shprehur se çdo pasuri e tij ka burim ligjor, ndërsa ka theksuar se familja e tij ka pasur të ardhura të tjera përveç tokës bujqësore.
“Të nderuar gazetarë më lejoni së pari të shpreh falënderim të sinqertë për të gjithë ju që keni ndjekur me vëmendje procesin tim të rivlerësimit. keni pasqyruar me realizëm të gjitha të dhënat, faktet, përjashto ndonjë gazetar që ka shpifur në mënyrë të vazhdueshme, juve sinqerisht ju falënderoj sepse i treguat publikut se cila ishte situata ime në procesin e rivlerësimit. Shkaku i parë i ankimit është diferenca financiare të 4 vitet, 2003-2006 në shumë e 6 mln lekë të vjetra. Të llogaritura sipas Komisioneri Publik dhe të pranuar nga KPA në kundërshtim me ligjin. Shkaku i dytë është mosdeklarimi i tokës bujqësore që bashkëshortja ime ka marrë në pronësi në vitin 1991. Bashkëshortja ime është larguar nga familja para 22 vitesh, është një pasur me burim të ligjshëm.
Shkaku tjetër i ankimit ka qenë mosdeklarimi i një banese, të ndërtuar në vitin 1985, të ndërtuar nga familja e bashkëshortes, kur ajo ka qenë e mitur. Ai truall 170 metër në atë fshat e ka sot vlerën 200 mijë lekë. Një shkak ankimi për 40 mijë lekë të vjetra. Të tjera shkaqe ankimi ishin huatë e marra nga familja ime. Huaja e marrë nga babai, vëllai e motra ime, nga xhaxhai im, 400 mijë lekë të reja, të cilat unë i provova tej çdo ndryshimi. Deklarova që familja ime ka pasur të ardhura të tjera përveç tokës bujqësore”, deklaroi Muçi.
Ndërohë, pas shkarkimit të Muçit, ka raguar Presidenca. Zëdhënësi i Presidencës, Tedi Blushi, është shprehur se pritej një vendim i tillë nga “vettingu i partisë”. Sipas tij, me vendimin e KPA synohet bllokimi i Gjykatës Kushtetuese.
“ZERO SURPRIZË nga vettingu i Partisë. Pas dështimit të rrëmbimit flagrant të Gjykatës Kushtetuese, rikthehet skenari për bllokimin e këtij institucioni nga të njëjtët aktorë që e bllokuan për tre vjet. TURP! TURP! TURP!”-shprehet Blushi.
Gjetjet e KPA për Besnik Muçin
“Lidhur me pasurinë apartament 57 m2, blerë në 2016 me vlere 1.9 mln lekë, për krijimin e të cilës KP pretendon se subjekti dhe personat e lidhur nuk justifikon, KPA vlerëson se subjekti nuk provon ligjshmërinë e huave të marra nga babai, vëllai e motra e tij. Subjekti është në kushtet e deklarimit të pamjaftueshëm. Lidhur me shkakun e ankimit të mos deklarimit të pasurisë së personit të lidhur, bashkëshortja, rezulton se në vitin 1991, subjekti dhe e shoqja kanë përfituar pasuri nga ligji7501, KPA vlerëson se subjekti dhe bashkëshortja nuk ka deklaruar me saktësi pasurinë. Për pasojë, subjekti gjendet në situatën e deklarimit të pamjaftueshëm. Lidhur me shkakun e ankimit për mos justifikim të shpenzimeve për vitet 2003-2006 subjekti nuk i justifikoj në burime të ligjshme. Subjekti gjendet në kushtet e deklarimit të pamjaftueshëm”
Me shkarkimin e Muçit, Gjykata Kushtetuese bën një hap pas, pasi mbetet me katër anëtarë, nga nëntë që duhet të ketë në total./ Opinion.al
