Kreu i opozitës, Lulzim Basha, reagoi pas deklaratave të kryeministrit Edi Rama, në konferencën e fundvitit me gazetarët, .
Sipas Bashës, Rama vijon të gënjejë në lidhje me ekonominë, duke ofruar vetëm premtime boshe. Ndër të tjera Basha thotë se ka ardhur koha për ndryshim dhe se Shqipëria ka nevojë për një tjetër qeveri.
“Edhe në fundit të vitit, Rama bëri atë që di të bëjë: gënjeu. Ai i ka dhënë Shqipërisë vetëm premtime boshe. Ai gënjen kur flet për ndihmë ekonomike. Fakti është se Shqipëria është vendi që jep ndihmën më të vogël ekonomike për qytetarët e saj. Kosto e jetesës rritet dita ditës, papunësia shtohet përditë, bizneset dhe dyqanet mbyllen dhe familjet shqiptare nuk marrin ndihmë nga qeveria. Por këto fakte nuk e pengojnë Ramën të gënjejë dhe të thotë se “çdo gjë është në rregull”. Kur i mohon problemet ku je zhytur, si mund t’i zgjidhësh ato?
Kupa është mbushur! Pas 7 vitesh dështime, Rama mund të ofrojë vetëm dështime të tjera më të mëdha. Shqipëria ka nevojë për ndryshim. Shqipëria ka nevojë për shpresë të re. Shqipëria ka nevojë për një qeveri që kujdeset për popullin, jo një qeveri që kujdeset për veten. Ky vit i keq do të kalojë dhe ne sëbashku do t’i kthejmë shpresën Shqipërisë”, shkruan Basha në Facebook.
Më herët, Kryeministri Edi Rama, gjatë konferencës “Ekonomia në fokus”, tha se është dyfishuar ndihma ekonomike gjatë muajve të pandemisë dhe ky dyfishim do të mbetet në fuqi edhe për vitin 2021./Opinion.al
