Kryetari i Partisë Demokratike i Lulzim Basha tha nga protesta e banorëve të Unazës se Re se pa u zgjidhur këto probleme Shqipërisë nuk mund ti hapen dyert e Europës.
Ai dënoi vendimin e gjykatës për të lënë në burg protestuesit ndërkohë që sipas tij janë lënë të lirë hajdutë dhe trafikantë.
“Një e keqe e madhe i ka bërë qytetarët sot, një e keqe qe ka zaptuar qindra familje në Unazën e Re. Qindra vogëlushë janë në një gjendje terrori prej një viti. Nga një banë që vendosën të vidhnin 40 milionë euro dhe të devijonin lumin e Lanës.
Në vend që ti shërbejnë ligjit janë vendosur këtu nga anti-ligji që vendosi të burgosë Eduard Ferhatin, Ruzhdi Dacin dhe Tomor Gjatën.
Është e njëjta drejtësi e korruptuar që nuk ka nisur hetimin ndaj Edi Ramës i cili ka shkelur ligjet amerikane. i lirë është edhe Damian Gjiknuri dhe Taulant Balla. I lirë është edhe Saimir Tahiri, i cili në 4 vite e ktheu Shqipërinë në një organizatë droge. Në një vend ku hajdutët janë të lirë dhe ku ata që mbrojnë shtëpinë burgosen.
Pa e zgjidhur këtë problem Shqipërisë nuk i hapen dyert e Europës. Nuk hapen dyert e Europës me një kryeministër hajdur. Shqipëria si gjithë Europa është thirrja e çdo shqiptari dhe e çdo demokrati. Shqipëria si gjithë Europa do të thotë hajdutët në burg dhe dëmshpërblim ndaj çdo qytetari. Mirëqenie dhe punësim për të gjithë qytetarët dhe jo vetëm për disa” tha Basha.
“Sot Europa flet me gjuhen e qytetarëve të bashkuar që duan ndryshim në Shqipëri. Europa e do Shqipërinë. Europa i do shqiptarët. Dështimi i sotëm nuk është dështimi i asnjë shqiptari të ndershëm, nuk është dështimi i Shqipërisë. Është dështimi i një njeriu që ka marrë peng Shqipërinë. Ky dështim mban vulën dhe firmën e të njëjtit njeriu që firmosi dhe vulosi aferrën korruptive tek Unaza e Re, që firmosi dhe vulosi vjedhjen e zgjedhjeve.
Pa u hetuar dhe pa u çuar para drejtësisë Edi Rama dhe gjithsecili prej bashkëpunëtorëve të tij nuk ka dhe nuk mund të ketë Shqipëri europiane. Këtë e kemi thënë prej fillimit ne demokratët, ne opozitarët, këtë sot e ka thënë me një gjuhë të qartë edhe Brukseli. Europa ka treguar se sa e drejtë dhe legjitime është kauza me të cilën nisi beteja e opozitës, beteja e Partisë Demokratike dhe aleatëve tanë.
Kjo nuk është një betejë për pushtet. Kjo nuk është nëj betejë për veten tonë. Nuk është betejë për karrige. Kjo është betejë për t’i dhënë fund një herë e mirë jo vetëm këtij regjimi hajdutësh, kriminelësh, pa drejtësi, pa gjykata, një regjimi i cili ka asgjësuar bazën e bashkëjetesës demokratike, votën e lirë.
Beteja jonë është që një herë e mirë t’i japim fund këtij tranzicioni të tmerrshëm, plot me vuajtje dhe dhimbje dhe padrejtësi dhe të hapim për të gjithë shqiptarët, pa dallim bindje politike, një kapitull ku politikanët të mbahen përgjegjës para ligjit njësoj si çdo qytetar i thjeshtë dhe sa herë që ta shkelin ligjin, të marrin dënimin e merituar nga një drejtësi e pavarur.
Për një Shqipëri kur kurrë më të mos cënohet vota, vjedhja e votës, blerja e votës, shkatërrimi i zgjedhjeve me krimin e organizuar, kapja dhe blerja e medias, mbyllja e zërit të gazetarit të lirë; janë tipare të një vendi autokrat dhe kriminal. Ato nuk janë tipare të një Shqipërie europiane ashtu siç e duam dhe luftojmë të gjithë sëbashku.
Por miqtë e mi, koha kur Shqipëria po ecën indietro po merr fund.
Koha kur Shqipëria sundohet nga paligjshmëria do të marr fund shumë shpejt. Gjashtë muaj më parë kur e nisëm këtë betejë, shumëkush nuk besoi, na talli dhe na përqeshi.
Sot Europa flet me gjuhën e qytetarëve të bashkuar që duan ndryshim, duan transformim të thellë politik dhe ekonomik që besojnë tek Shqipëria, që besojnë tek demokracia, që besojnë tek liria, që besojnë tek familja, besojnë tek atdheu, besojnë tek Europa” shtoi kryetari i opozitës.
Në fund të fjalës së tij ai komentoi ndryshimet e Kodit Penal të ndërmarra nga Kuvendi.
“Nuk ka kod penal që të ndalojë protestën, kjo ndodh vetëm në vendet diktatoriale” tha kreu i PD-së. /Opinion.al
