Drafti që i është dërguar vendeve anëtare të Bashkimit Europian lidhur me çeljen e negociatave me Shqipërinë dhe Maqedoninë e Veriut është ndryshuar.
Në draftin fillestar propozohej celja e negociatave me të dyja vendet por në versionin që i është dërguar të premten vendeve anëtare për takimin e së martës, janë shtuar kushtet për Shqipërinë.
Sipas draftit, Këshilli vendos çeljen e negociatave me Shqipërinë por kjo do të varet nga kushtet të cilat ajo do të plotësojë deri në konferencën e parë ndërqeveritare në vitin 2020.
“Para konferencës se pare ndërqeveritare, e cila duhet te zhvillohet jo me vone se ne gjysmën e pare te vitit 2020, ne varësi te progresit te bere, Shqipëria duhet te siguroje funksionimin e gjykatës kushtetuese dhe gjykatës se larte si dhe te beje progres te mëtejshëm ne lidhje me reformën zgjedhore ne përputhje me rekomandimet e OSBE/ODIHR”
Funksionimi i Gjykatës së Lartë dhe asaj Kushtetuese si dhe Reforma në Drejtësi janë dy kushtet paraprake që Shqipëria duhet të plotësojë përpara konferencës së parë ndërqeveritare.
Kushtet e tjera përfshijnë nisjen e hetimeve ndaj gjyqtarëve dhe prokurorëve të dyshuar për sjellje kriminale si rezultat i gjetjeve nga procesi i veting-ut, hetim të rasteve dhe akuzave për krim elektoral, ngritja dhe funksionimi i SPAK, rezultate konkrete në luftën kundër korrupsionit dhe krimit të organizuar, përfshirë zyrtarët e nivelit të lartë dhe të zbatohet vendimi i Gjykatës Kushtetuese për zgjedhjet lokale të 30 qershorit 2019.
Dokumenti mban vulën gjermane dhe kushtet e shtuara janë pak a shumë të njëjtat me ato që miratoi Bundestagu disa javë më parë.
Kancelarja Merkel dhe Presidenti Macron takohen sonte para takimit të ambasadorëve të vendeve të BE të hënë, ndërsa të martën është takimi në Luksemburg i ministrave të Jashtëm të Unionit. /Opinion.al
