Kreu i Partisë Demokratike, Lulzim Basha, i është bashkuar sërish protestuesve pasditen e sotme në çadrën e vendosur pranë Kryeministrisë.
Gjatë një bashkëbisedimi me të rinjtë e mbledhur aty, Basha u ka premtuar atyre se në ditën e parë të detyrës së tij si kryeministër, do të anulojë ligjin e Arsimit të Lartë.
“Për studentët dhe arsimin e lartë, një qeveri e zgjedhur me votë të lirë të qytetarëve shqiptarë, që unë do kisha nderin t’i shërbeja si kryeministër, në ditën time të parë do të firmos anulimin e ligjit të arsimit të lartë. Në plehra e ka vendin ligji që vjel shqiptarët, që i bën të paguajnë dyfish qytetarët shqiptarë, njëherë nga taksimi i përgjithshëm që i merr shqiptarëve, e njëherë nga tarifa. Ne nuk do të pranojmë kurrë që vendimet për arsimin e lartë t’i marrin një grusht politikanësh, e aq më pak ministrja e salcës që nuk ka kualifikimet e nevojshme për të qenë ministre, e aq më pak e arsimit. Këtë vendim duhet ta marrin grupet e përbashkëta të akademikëve dhe studentëve. Nuk do të ketë asnjë të ri shqiptar që do të mbetet pa studiuar për shkak të pamundësisë ekonomike.
Për ata që mbarojnë arsimin e lartë dhe enden rrugëve, qeveria ime ka një plan. Ju prisni me të drejtë, dhe unë do ju jap modelin europian në qeverisje. Çfarë është e mirë për Europën, është e mirë edhe për shqiptarët. 10 mijë stazhe në vit me pagesë 200 mijë lekë në muaj plus sigurimet shoqërore e shëndetësore, kjo është skema që ne nxisim, që studentët të mos mbeten rrugëve e kafeneve, por të njohin tregun e punës, të industrisë, apo vendin e punës. Kjo skemë do të paguhet nga buxheti i shtetit. Paratë do t’i marrim nga xhepat e derrave që sot i vjedhin, dhe i marrin në koncesione korruptive, tipike rilindase”, tha Basha.
Teksa ka ritheksuar edhe një herë kërkesën e protestuesve për zgjedhje të lira e të ndershme, Basha u shpreh se qeveria teknike është vetëm stacioni i parë i kësaj lëvizje popullore.
“Kjo është një protestë popullore dhe qëllimi është t’i kthejmë popullit një republikë demokratike. Qeveria teknike është vetëm stacioni i parë. Së bashku po hedhim themelet e një Shqipërie tjetër, e një republike tjetër. Ndërkohë që vjedhin e batërdisin pasuritë e vendit, e kanë zhytur Shqipërinë si asnjë herë më parë në drogë e krim. E tashmë po kërkojnë të vjedhin zgjedhjet. Synojnë që të shndërrojnë çdo qytetar të këtij vendi, në një skllav të kësaj qeverie fasadë.
Jemi këtu për t’i thënë jo kësaj. Jemi këtu për të hedhur nga themelet këtë ngrehinë të kalbët e të korruptuar. Kush ka nostalgji, apo dëshiron të jetë pjesë e regjimit të vjetër, ta dijë se do të na ketë kundër, të gjithëve ne, qytetarëve. Ne nuk do ndalemi derisa ta shembim. Republika e krimit dhe korrupsionit do të marrë fund, ky është vendimi i shqiptarëve, ne nuk tërhiqemi deri në fitore. Miqtë tanë nga Brukseli në Washignton, Athinë, Londër e kudo ku janë, japin mbështetjen e tyre për zgjedhje të lira e të ndershme. Mos besoni këdo që ju thotë ndryshe. Nuk ka njeri europian e amerikan që të jetë kundër zgjedhjeve të lira e të ndershme. Ndaj zgjedhjet që do të vijnë duhet të garantojnë parimin themelor të demokracisë, zgjedhje të lira e të ndershme. Por zgjedhje të tilla nuk mund të ketë me kriminelët në pushtet, me Shqipërinë hambar droge për të mbështetur kriminelët në pushtet”, u shpreh kryedemokrati.
Në fund të fjalës së tij, Basha ka përcjellë edhe një mesazh për studentët dhe të rinjtë shqiptarë:
“Të rinjve shqiptarë, studentë dhe gjimnazistë, u them bëhuni gati, Shqipëria që po vjen është Shqipëria juaj. Do të jetë vetëm në duart tuaja, Shqipëria që po vjen. Asgjë nuk do të jetë më si më parë. Gjithçka do të ndryshojë me fuqinë e kësaj lëvizje popullore, kombëtare, dhe demokratike. Kastat do të përmbysen, republika e krimit do të marrë fund. PD dhe unë jemi të vendosur të bëjnë pjesën tonë në këtë betejë kombëtare, në këtë lëvizje kombëtare e popullore. Vendimi ishte në dorën tuaj, dhe fitorja është në dorën tuaj. Unë nuk tërhiqem, parlamenti i krimit ka marrë fund, ky këtu është parlamenti i vërtetë i republikës së re që po lind. Ndaj ju kërkoj që duke luftuar për kërkesat tuaja të drejta, për tarifa të ulura, për kuotat, për stazhet e paguara nga shteti, të mbështesni kauzat e drejta, e sidomos atë që do ta mundësojë këtë, zgjedhjet e lira e të ndershme”.
