Gazmend Bardhi ka bërë të ditur sot në Kuvend se grupi Parlamentar i Partisë Demokratike do të votojë pro projektligjit për rritjen e pagave.
Edhe pse pro këtij vendimi, Bardhi e akuzoi qeverinë se në 10 vite nuk u pranua asnjë propozim nga opozita për rritje pagash, ndërsa këtë vit u përdor nga mazhoranca në periudhë elektorale.
Ai akuzoi kryeministrin se rezultatin e këtyre zgjedhjeve e ka siguruar me njerëz të shpallur “non grata” nga Shtetet e Bashkuara të Amerikës.
“Bërë mirë që po ikën. Fole këtu për 35 minuta. Shpjegove rezultatin historik të PS, siç e quajte. Rezultatin e opozitës, por nuk shpjegove dot rezultatin e aleatit tënd, non-grata, Tom Doshi. Se në fakt konkluzioni domethënës i zgjedhjeve të 14 majit është rezultati i aleatit politik i Ramës, në të gjithë Shqipërinë, aleati non-grata të Ramës, Tom Doshi. Ai është thelbi i pushtetit të Ramës. Një këmbë të pushtetit në Durrës ia garantoi Vangjush Dako, një këmbë në Shkodër ia garantoi Tom Doshi, non-grata, për të cilin ai nuk flet. Dhe në vend që të japë llogari për masakrën elektorale, merret me opozitën.
Në fakt do të duhet të jepte shpjegime se pse në 10 vite nuk ka sjell në Kuvend asnjë projektligj për rritje pagash edhe pse çmimet janë dyfishuar. Foli për jomoral, por s’ka asgjë pa moral që të rrisësh rrogat e ministrave dhe deputetëve. E pamoralshëm është që të vjedhësh tendera apo të drekosh dhe darkosh me kriminelë. Po të marrim me kë rri ti i bie të jesh pjesë e llumit. S’ka asnjë dyshim që vota e grupit parlamentar të PD-së do të jetë pro sepse jetesa është vështirësuar për çdo punonjës të administratës publike, por ky vendim sot është jo vetëm i vonuar por dhe i pastudiuar”, tha Bardhi./Opinion.al
