Greqia kërkon ndërtimin e 8 mijë varreve të tjera të ushtarëve grekë. “Jo”-ja greke u përkujtua dje me një sërë aktivitetesh, ku fillimisht u iniciua në Manastirin e Këlcyrës, aty ku prehen eshtrat e mbi 700 ushtarëve grekë të rënë në luftën italogreke në fillim të viteve ‘40.
Në meshën e mbajtur me këtë rast nga kleri ortodoks në Gjirokastër në këtë manastir, të pranishëm kanë qenë ambasadorja greke në Shqipëri, Elenis Uraniu, kryetari i PBDNJ- së, Vangjel Dule, si dhe konsulli grek në Gjirokastër. Ceremonia në Këlcyrë ka filluar me vonesë për shkak të pritjes së tre autobusëve me familjarë të ish-ushtarëve grekë të rënë në luftën italogreke në territorin e qarkut të Gjirokastrës.
Më pas kolona me grekët ka udhëtuar më në Jug, duke u stacionuar në fshatin Bularat në Dropull, aty ku ndodhet një tjetër varrezë me ushtarë. Në Bularat, miqtë nga Greqia janë shtuar akoma me prezencën e gati 200 të tjerëve.
Ajo që ka rënë në sy ishte pjesëmarrja e mjaft përfaqësuesve nga spektri politik patriotik grek, apo dhe parti politike si “Agimi i Artë”, që përfaqësohej nga Konstantinos Anagnostis, Kostas Macias, kryetar i Shoqatës Panhelenike Botërore, si dhe Jorgos Surrlas, ish-nënkryetar i parlamentit grek, ish-sekretar i Ministrisë së Drejtësisë greke dhe prej vitesh kryetar i Shoqatës së Familjarëve të ushtarëve grekë të rënë në luftën italo-greke. Surrlas duke iu referuar çështjes së mbetur pezull për gjetjen, grumbullimin dhe rivarrosjen e të rënëve në luftën italo-greke në Shqipëri ndër të tjera tha se shpresonte në plotësimin e kërkesave që janë përsëritur në adresë të qeverisë shqiptare.
“Komiteti i përbashkët ndërshtetëror që ka për qëllim zgjidhjen e kësaj çështjeje të bazuar në marrëveshjen e nënshkruar në vitin 2009 rifilloi nga puna dhe takimi i dytë u mbajt në Athinë para pak ditësh, ndaj dhe shpreh bindjen se do çelet rruga dhe gjendet zgjidhja e trajtimit të çështjes së mbledhjes së eshtrave të afro 8 mijë ushtarëve grekë që gjenden në territorin shqiptar, përveç varrezave që janë ngritur në Këlcyrë dhe Bularat”, u shpreh Surrlas.
Ndërsa ambasadorja greke në Shqipëri, Elenis Uraniu, përshkroi sakrificën e popullit grek për liri dhe glorifikoi potencialin e popullit të saj siç e quajti, që lirinë e ka në ADN-në e vet ku buron nga Leonidha, për të vazhduar te perandori i fundit bizantin Kostandin Paleologu dhe përfunduar me “Jo”- në greke të vitit 1940-1941.
Sakaq, kreu i “Agimit të Artë” për Rajonin e Janinës, Konstantinos Anagnostis, shprehet se shqiptarët duhet të lejojnë hapjen e varrezave të reja në Jug të vendit. “Agimi i Artë” nuk është dakord me qëndrimin e shqiptarëve dhe të çamëve që janë kundër ndërtimit të varreve të reja të ushtarëve tanë këtu dhe kjo nuk është e drejtë. Ata (shqiptarët) duhet të na ndihmojnë edhe neve që të rivarrosim eshtrat e të parëve tanë në këtë vend që kanë luftuar ndaj pushtuesit të përbashkët. Partia jonë “Agimi i Artë” nuk i shikon shqiptarët si popull armik sepse jemi komshinj të mirë dhe si çdo shtet edhe me Shqipërinë, ne kemi kufijtë tanë dhe secili i respekton ato. Ndërsa shqiptarët, në raport me bashkatdhetarët tanë këtu në Jug të Shqipërisë përgjithësisht sillen mirë, por ka edhe qëndrime ekstreme ndaj tyre, por besoj se janë në minorancë”, u shpreh Anagnostis./Piro Nase/Panorama
