Ditët e fundit në opinionin publik grek por edhe në atë shqiptar është përfolur gjatë për një fond sekret të financuar nga Ministria e Jashtme e Greqisë me qëllim investimin në blerjen e opinionbërëseve në Shqipëri.
Fondi i cili thuhet se ekziston ka ngritur një furtunë politike në Greqi që lidhet me shpërdorimin, ndërsa në Shqipëri publikimi i listëpagesës me emra të përveçëm ka hapur një diskutim tjetër, atë të një tradhtie Kombëtare, që ligjërisht është shumë më e dënueshme se sa shpërdorimi që mund ti ketë bërë shteti grek një fondi që në fund të fundit i ka shërbyer interesit të tyre kombëtar.
Por ajo që të bie në sy në listën e emrave të publikuar që ashiqarazi duken fals, është mungesa e disa personazheve që në të vërtetë i kanë shërbyer shtetit grek kohë pas kohe, edhe duke marrë armën dhe duke dalë “malit”.
Një nga këto personazhe që çuditërisht nuk na qenka financuar nga shteti grek është Panajot Barka, një mbrojtës i thekët i kauzës panheleniste kur vjen puna për ca punë qoftë edhe parëndësi grekësh në Shqipëri.
Por a është paguar Panajot Barka nga Fondi Sekret i Ministrisë së Jashtme Greke për të destabilizuar Shqipërinë?
Kjo foto e tij në vitin 1997 me kallash në sup, në jugun e Shqipërisë ku u ul flamuri shqiptar dhe u ngrit flamuri grek, apo ku muret e Jugut u mbushën me mbishkrime në gjuhën greke në siglën “VorioEpir”, nuk ka se si ta shmangë dyshimin që Panajot Barka me qëndrimet e tij të herëpashershme në interes të shtetit grek është i paguar nga qeveria e këtij vendi për të destabilizuar Shqipërinë.
Dhe këtu nuk bëjmë fjalë për një personazh të dosidoshëm, por për një pedagog në Universitetin “Eqrem Çabej” të Gjirokastrës, i cili paguhet nga taksat e qytetarëve shqiptarë për të punuar kundër interesave të vendit të tyre.
Fotoja me kallash në vitin 1997 është vetëm një evidencë e asaj se çfarë prezanton personazhi i Panajot Barkës.
Dhe këtu vlen të përmendim disa nga thagmat e tij në “dobi” të shtetit që e mban me rrogë të deklaruar, që në këtë rast është Shqipëria.
Në vitin 2016, Panajot Barka, në komunën e Pogonias në bashkëpunim me Federatën Epirotase i kërkoi shtetit grek që të hedh në gjyq Shqipërinë në Gjykatën Ndërkombëtare, sepse sipas tij Shqipëria i kishte vjedhur Greqisë Isopolifoninë.
Kësisoj Barka bënte thrrje që Greqia të punonte që UNESCO ti hiqte Ison Labe Shqipërisë si trashgimi botërore kulturore të mbrojtur.
Dhe këtë deklaratë e bënte në krah të Mitropolitit të Konicës Andreas, i njohur për deklratatat e tij antishqiptare.
Por Panajot Barka ka edhe një thagmë tjetër që nuk i është tharë ende boja.
Edhe pse han e pin me paratë e taksave të shqiptarëve, Barka me mbiemër shqiptar, nuk e lidh dot gjuhën kur vjen puna për të fshirë nga ekzistenca shqiptarët.
Janë tashmë të njohura deklaratat e tij se; “Shqipëria e Jugut nuk ka ekzistuar kurrë”.
Dhe këto nuk i ka thënë në një kafene, pijshëm pas gotës së dytë të uzos, por në faqen zyrtare të Universitetit Publik të Gjirokastrës, në një material filmik ku sipas tij “Zona e Epirit, Gjirokastra dhe jugu janë Greqi dhe Shqipëria nuk ka ekzistuar”.
Cili lob e ktheu si pedagog Panajot Barkën e shkarkuar nga detyra për falsifikim të dokumenteve zyrtare dhe a është i paguar ky personazh tipik antishqiptar nga Fondi Sekret Grek për të destabilizuar Shqipërinë, kjo është pjesë e një dyshimi të arsyeshëm që mund të merret si indicie nga Prokuroria, për të nisur hetimet ndaj tij dhe kujtdo që paguhet për të dëmtuar interesat e Shqipërisë.
Nëse Shqipëria do kërkojë të jetë një vend sovran i cili mbron interesat e saj, duhet të marrë edhe njëherë parasysh vlerësimin dhe radikalizimin e Kodit Penal kur flitet për “Tradhti Kombëtare”.
Ndryshe personazhe si Barka apo mbetjet panheleniste që hanë bukën e shqiptarëve por që proklamojnë ndarjen dhe destabilitetin e Shqipërisë, do të jenë gangrena e këtij vendi.
Dhe për ta shpëtuar njeherë e mirë këtë vend nga kjo gangrenë, duhet shkurtuar gjymtyra e kalbur, qoftë edhe me kosto në marrëdhëniet që duken jo fort fair play midis Greqisë dhe Shqipërisë.
