A është mikesha e Ramës pas tenderit 120 mln euro të kontrollit shëndetësor?

TIRANË- Kryeministri Edi Rama i jep tenderin e check up mikeshës së tij Vilma Nushi. Bëhet fjalë për projektin e madh që Qeveria e ka lancuar me shumë bujë kontrollin falas të popullsisë nga mosha 40-65 vjeç. Këtë e deklaron Partia Demokratike, ndërsa Ministria e Shëndetësisë deri tani nuk e ka mohuar.

PD akuzon se jo vetëm që tenderi është klientelist por është duke rrezikuar edhe jetën e qytetarëve kompania e Vilma Nushit që po bën Check up.

Ja çfarë thotë Albana Vokshi nga selia e PD-së për këtë tender

Kontrolli bëhet me infrastrukturën dhe pajisjet e qendrave shëndetësore, me stafin e qendrave shendetësore. Punën e bëjnë infermierët dhe stafi që paguhet nga shteti, nga taksat tona. Madje infermierët e qendrave shëndetësore punojnë mesatarisht 3 – 4 orë në ditë për llogari të Vilma Nushit. Pra punë e bërë nga stafi i QSH pa asnjë bonus pasi Vilma as këtë nuk e paguan.

Vilma deri më sot duhet të hapte 18 laboratore, deri më sot vetëm 3 janë hapur, ndërsa 15 të tjerëve u është blerë vetëm emri se analizat e tyre sillen në Tiranë.

E vetmja gjë që bën mikja e kryeministrit, është se bën taksinë, në fakt merr kampionet me makinat që shpërndan duhanin, biznesin e saj primar.

Pra 120 milionë euro, Edi Rama, ia ka dhënë mikes së tij, që makinat e saj pasi të kenë shpërndarë cigaret nëpër Shqipëri, në kthim, ato të marrin kampionet e lëna disa orë në pritje, çka dëmton edhe garancinë e cilësinë e analizës që në shumë raste edhe ngatërrohen.

Një kaos skandaloz që jo vetëm nuk po i shërben qytetarëve, por po bëhet një rrezik i madh për shëndetin e tyre.

Partia Demokratike i kërkon mikes së Edi Ramës të tërhiqet nga ky abuzim e të kthejë paratë e shqiptarëve.

Partia Demokratike do ta anullojë këtë vjedhje, këtë abuzim skandaloz me paratë dhe shëndetin e shqiptarëve.

*Foto ilustruese: Elisa Spirolapi, Edi Rama, Vilma Nushi (në rreth) dhe Shkëlqim Cani