Ambasadorja e SHBA në Tiranë, Yuri Kim ka deklaruar se pas shpalljes së vizave 10-vjeçare të SHBA për Shqipërinë dhe lehtësimit të kufizimeve të masave COVID-19 për udhëtimet, ka pasur një rritje të aplikimeve për viza, gjë që ka sjellë pritje të gjata për intervista.
Përmes një statusi në “Twitter”, ambasadorja sqaron se për rastet urgjente si për shembull, trajtim mjekësor, vdekje familjare, të kërkohet trajtim i përshpejtuar kur aplikohet.
“Pas shpalljes së vizës 10-vjeçare të SHBA për Shqipërinë dhe lehtësimit të kufizimeve të udhëtimit COVID, ka pasur një rritje të aplikimeve për viza, gjë që ka sjellë pritje të gjata për intervista. Ne e dimë se kjo është zhgënjyese dhe ekipi ynë konsullor po punon shumë për të ulur kohën e pritjes.
Në raste urgjence të vërtetë (trajtim mjekësor, vdekje familjare, programe studentore ose shkëmbimi me afat të caktuar), ju lutemi kërkoni përpunim të përshpejtuar dokumentesh kur aplikoni. Ju gjithashtu mund të shkruani në [email protected] që të aplikoni për trajtim më të përshpejtuar të kërkesës për vizë”, shkroi Kim në Twitter.
