Është zbardhur këtë të martë vendimi i Gjykatës së Posaçme kundër Korrupsionit dhe Krimit të Organizuar për ish-ministrin e Mbrojtjes Fatmir Mediu për çështjen “Gërdeci”.
Gjykata shprehet se afatet e parashkrimit janë respektuar pasi Mediu është marrë i pandehur që në vitin 2009. Po ashtu thuhet se imuniteti, pengesa e vetme që ka qenë ka rënë kështu që konsiderohet e hapur rruga e gjykimit.
“Nuk është gjë e gjykuar. Afatet e parashkrimit janë respektuar se është marrë i pandehur që në vitin 2009. Pengesa e imunitetit ishte përkohshme. Rënia e kushtit për pasur imunitet konsiderohet fakt i ri që hap rrugën e gjykimit”, thuhet në vendimin e gjykatës, raporton abc news.
Gjykata e Posaçme vendosi që të rihapë çështjen “Gërdeci”, duke nisur rigjykim për ish-ministrin e Mbrojtjes Fatmir Mediu, duke pranuar kështu kërkesën e prokurorisë dhe të familjes Durda.
Shpërthimi në fabrikën e demontimit të armëve në Gërdec, shkaktoi vdekjen e 26 personave, plagosjen e rëndë të 27 të tjerëve, plagosjen e lehtë të 109 të të tjerëve. /Opinion.al
