Dy janë pistat ku po heton policia për ngjarjen e ndodhur mbrëmjen e djeshme në Vlorë, ku u ekzekutua me armë zjarri në derën e banesës së tij Shkëlzen Velaj.
Sipas news 24, një nga pistat e hetimit është ajo e hasmërisë së vjetër për shkak të vrasjes së vëllait të tij në Masakrën e Çoles më 7 prill të 2015-ës, ndërsa pista e dytë është konflikti për lëndë narkotike.Velaj ishte i papunë, ndërsa jetonte i vetëm me nënën e tij.
Ngjarja ndodhi rreth orës 23:55, në lagjen “24 Maji”. 35-vjeçari Velaj ka qenë duke hyrë për në shtëpi, kur ka vënë re se pranë pallatit ka qenë duke u ndjekur nga një makinë e dyshimtë. Velaj e ka lënë makinën e tij ndezur dhe ka ikur me vrap për tu futur në banesë, në katin e 5 të pallatit, ndërsa në momentin që ka qenë duke hapur derën atentatori ka lëshuar breshëri plumbash në drejtim të tij. Plumbat në drejtim të 35-vjeçarit kanë qenë nga një distancë e afërt. Në trupin e Velaj është derdhur një karikator automatiku, të cilat i shkaktuan vdekjen. Autoritetet në vendin e ngjarjes gjetën 30 gëzhoja. Sakaq, atentati dyshohet të jetë kryer nga 2 apo më shumë persona.
Ndërkohë pas ekzekutimit autorët janë larguar në drejtim të rrugës së lumit të Vlorës, në afërsi të fshatit Babicë, ku kanë braktisur makinën tip BMË pa targa dhe e kanë djegur./Opinion.al
