Singapori është një tjetër shtet që i shtohet listës së vendeve që kanë aprovuar vaksinën e Pfizer-BioNTech kundër COVID-19.
Lajmin e ka dhënë kryeministri i Singaporit Lee Hsien Loong, i cili është shprehur se dërgesa e parë e vaksinave do të mbërrijë në fund të muajit.
“Unë jam shumë i lumtur t’ju them se pasi ka studiuar provat shkencore dhe të dhënat e provave klinike, Autoriteti i Shkencave të Shëndetit ka aprovuar vaksinën Pfizer/BioNTech për përdorim. Dërgesa e parë duhet të mbërrijë në fund të këtij muaji”, tha kryeministri i vendit, Lee Hsien Loong.
Kryeministri i Singaporit po ashtu bëri me dije se të parët që do vaksinohen janë personat me rrezik më të lartë nga pandemia, duke përfshirë punonjësit e kujdesit shëndetësor dhe të moshuarit.
“Ne gjithashtu presim që vaksinat e tjera të arrijnë në Singapor në muajt e ardhshëm dhe nëse gjithçka shkon sipas planit, ne do të kemi vaksina për të gjithë në Singapor deri në tremujorin e tretë të 2021”, tha Lee. Ai gjithashtu theksoi se vaksina do të jetë falas dhe nuk do të jetë e detyrueshme.
Vaksina e Pfizer-BioNTech është miratuar për përdorim edhe në SHBA, Mbretërinë e Bashkuar, Kanada, Kuvajt, Bahrein, Arabi Saudite dhe Meksikë./ Opinion.al
