Presidenti, Ilir Meta i ka drejtuar një kërkesë zyrtare Kuvendit të Shqipërisë për të marrë parasysh opinionin e Komisionit të Venecias, lidhur me Kodin Zgjedhor.
Kreu i shtetit thotë se duhet pritur mendimi i Venecias pasi ndryshimet në Kodin Zgjedhor janë hartuar në mënyrë të përshpejtuar dhe të njëanshme.
“Në vijim të shkresës sonë me anë të së cilës ju kemi përcjellë dekretin e presidencës për kthimin për shqyrtim të ligjit për disa shtesa në Kodin Zgjedhor ju përcjellim zyrtarisht për njohje e dijeni kërkesën e presidentit të Republikës drejtuar Komisionit Europian për Demokraci (Komisionit të Venecias) për marrjen e një opinioni urgjent mbi procesin e ndryshimit të njëanshëm dhe të përshpejtuar të Kushtetutës dhe Kodit Zgjedhor të Republikës së Shqipërisë.
Gjejmë rastin të përsërisim edhe njëherë thirrjen e presidentit të Republikës se tashmë pas kthimit në Kuvend duhet ta rishqyrtojë edhe njëherë këtë nismë nën dritën e arsyetimit dhe të rekomandimeve të Venecias”, shkruhet në kërkesën e Presidentit.
Kujtojmë se Presidenti,Ilir Meta, ktheu të premten ligjin për Kodin Zgjedhor në Kuvend për shkak se ndryshimet në këtë kod u miratuan pa dakordësinë e opozitës jashtëparlamentare./ Opinion.al
