Shqipëria ka bërë hapa para në luftën kundër korrupsionit dhe krimit të organizuar por Gjykata Kushtetuese mbetet ende një kusht i paplotësuar për konferencën e parë ndërqeveritare e cila shënon çeljen e negociatave.
Këto janë disa nga përfundimet e progres-raportit të Komisionit Europian për Shqipërinë i cili pritet të prezantohet ditën e sotme nga Komisioneri për Zgjerimin Oliver Varheli.
Sipas raportit autoritetet shqiptare forcuan kapacitetet operacionale, koordinuese dhe monitoruese në luftën kundër korrupsionit. Megjithatë ata e konsiderojnë korrupsionin një problem serioz për Shqipërinë. Përparim është vlerësuar se është bërë edhe në luftën kundër krimit nga ana e autoriteteve.
Pavarësisht gjendjes së jashtëzakonshme, Shqipëria ka bërë përparime vendimtare dhe është pranë plotësimit të kushteve të vendosura në prag të konferencës së parë ndërqeveritare, thuhet në progres raport.
Komisioni Europian e quan të përmbushur kushtin e miratimit të reformës zgjedhore sipas rekomandimeve të OSBE/ODIHR. Megjithatë ata shprehen se pavarësisht nga rezultati pozitiv i marrëveshjes së arritur në 5 qershor 2020, dialogu politik në vend duhet të përmirësohet.
Klima politike në Shqipëri mbetet e polarizuar ndërsa Gjykata Kushtetuese mbetet i vetmi kusht ende i paplotësuar për Konferencën e parë të anëtarësimit, sipas raportit./ Opinion.al
