Presidenti Meta ka zhvilluar një bisedë telefonike me të dërguarin e posaçëm për Ballkanin Perëndimor, Matthew Palmer.
Ishte zëdhënësi i Presidentit, Tedi Blushi ai që la fillimisht të kuptohej diçka e tillë, por tani lajmi është konfirmuar edhe nga ambasada e SHBA.
Kjo e fundit doli ditën e sotme me një reagim në lidhje me situatën e krijuar për ringritjen e Gjykatës Kushtetuese, ku fton palët ta çojnë çështjen në Komisionin e Venecias.
“Institucionet gjyqësore shqiptare, kushtetuta dhe ligjet për zbatimin e reformës në drejtësi, duhet të udhëheqin procesin e zgjidhjes së këtyre interpretimeve të debatuara. Në mungesë të një institucioni të përshtatshëm ligjor, i cili mund të vendoste mbi interpretimet e kundërta, Shtetet e Bashkuara mbështesin çuarjen e çështjes në Komisionin e Venecias, si një palë e tretë kompetente dhe e paanshme, për opinionin e tij ligjor. Gjithashtu, nxisim palët kundërshtuese që të respektojnë opinionin ligjor të Komisionit të Venecias”, shkruante ambasada./Opinion.al
