Gazeta prestigjioze gjermane ‘Der Spigel’ i ka kushtuar një shkrim situatës politike në Shqipëri të krijuar ditën e djeshme.
Në qendër të shkrimit është përplasja e Presidentit Ilir Meta dhe Kryeministrit Rama. “Presidenti shqiptar, Ilir Meta ka anuluar zgjedhjet lokale, duke shkaktuar në këtë mënyrë një konflikt të rëndë me kryeministrin Edi Rama” e hap shkrimin e saj ‘Der Spigel’. Ajo bën një panoramë të ngjarjeve që kanë kontribuar në vendimin e djeshëm të Metës.
Sipas saj demokracia shqiptare është në krizë dhe në mes të kësaj krize qeveria po përpiqet të shkarkojë presidentin, ndërsa opozita po përpiqet të qeverinë.
Në fokus të veçantë vihet mungesa e gjykatës kushtetuese dhe ngërçit që ajo prodhon për situatën e krijuar. “Edhe Gjykata Kushtetuese, e cila është kompetente për raste të tilla, nuk do jetë në gjendje të përmirësojë situatën: ajo nuk ka kuorum prej më shumë se një viti” shkruan e përditshmja gjermane.
Shkrimi i plotë i Der Spigel
Presidenti shqiptar, Ilir Meta ka anuluar zgjedhjet lokale, duke shkaktuar në këtë mënyrë një konflikt të rëndë me kryeministrin Edi Rama. “Në kushtet aktuale, nuk mund të ketë zgjedhje të vërteta, demokratike dhe përfaqësuese,” tha Meta të shtunën.
Rama e shpalli lëvizjen e presidentit të dielën si të pavlefshme. Zgjedhjet do të zhvillohen ashtu siç është planifikuar, më 30 qershor, tha ai në një takim elektoral në Burrel, raporton TV Klan. “Ilir Meta vulosi dje fatin e tij dhe humbi të drejtën për të qëndruar në detyrë,” tha Rama.
Meta zgjodhi të anulonte zgjedhjet në sfondin e protestave të opozitës së djathtë, që vazhdojnë prej javësh. Kjo e fundit e akuzon Ramën dhe qeverinë e tij socialiste për mashtrim dhe korrupsion zgjedhor, dhe ka kërcënuar me bojkot të zgjedhjeve vendore. Gjithashtu të shtunën në mbrëmje, mijëra mbështetës të opozitës demonstruar përpara parlamentit në Tiranë.
Gjykata Kushtetuese nuk mund të marrë vendime
Dorëheqja e Ramës nuk është e negociueshme, tha kreu i Partisë Demokratike të opozitës, Lulzim Basha, të shtunën në mbrëmje përpara demonstruesve. Vendimi i presidentit Meta për të anuluar zgjedhjet lokale ishte ‘rezultati i parë i luftës kundër Edi Ramës’.
Rama është në detyrë që prej vitit 2013 dhe u rizgjodh në qershor të vitit 2017. Opozita e akuzon atë për manipulimin e rezultateve zgjedhore. Gazeta gjermane Bild ka publikuar regjistrime telefonike, të cilat duhet të provojnë blerjen e votave.
Konflikti i ri mes Presidentit Meta dhe Kryeministrit Rama e thellon krizën politike në vendin, që po pret një datë për nisjen e bisedimeve të pranimit në BE. Edhe Gjykata Kushtetuese, e cila është kompetente për raste të tilla, nuk do jetë në gjendje të përmirësojë situatën: ajo nuk ka kuorum prej më shumë se një viti.
Arsyeja: në fillim të vitit 2018, një komision nisi punën për të kontrolluar gjyqtarët dhe prokurorët për origjinën e pasurisë së tyre dhe për lidhjet e mundshme me krimin e organizuar. Disa gjyqtarë të Gjykatës Kushtetuese, që nga ajo kohë ose janë rrëzuar nga posti ose e kanë dorëzuar vullnetarisht detyrën. /Opinion.al
