Megjithëse më 5 mars deklaroi se nuk do ta merrte mandatin, Alban Zeneli nga sot është deputet i Kuvendit të Shqipërisë. Alban Zeneli ka lindur më 4 maj 1969 në Kukës. Gjatë qeverisjes së Partisë Demokratike, Zeneli ka mbajtur detyrën e zëvendësdrejtorit të Shërbimit Informativ Ushtarak dhe këshilltarit të ish-ministrit të Mbrojtjes, Arben Imamit. Gjatë viteve 2013-2017, Alban Zeneli është zgjedhur deputet në Qarkun e Kukësit dhe ka qenë anëtar i Komisionit të Sigurisë Kombëtare. Në CV-në e dorëzuar në Komisionin Qendror të Zgjedhjeve, ai deklaron se ka kryer arsimin e lartë dhe master në fushën e Sigurisë.
Ndërkohë, në formularin e dekriminalizmit Zeneli pranon se është dënuar dy herë me vendime gjyqësore të shkallës së prerë. Në gusht të vitit 1992, Zeneli është dënuar me 6 muaj heqje lirie për shkak të shkeljeve të rregullave të qarkullimit rrugor. Zeneli është dënuar me vendim të formës së prerë edhe në vitin 1996 me 30.000 lekë gjobë, për veprën penale të kundërshtimit të punonjësve të Policisë dhe prishje të qetësisë publike.
Në vitin 2015, deputeti u përball me një sëmundje të rëndë dhe qeveria “Rama” garantoi kurimin e tij jashtë shtetit me një fond prej 4 milionë lekësh të reja. “Sipas VKM-së nr.711 datë 26.8.2015, është miratuar fondi në masën 4 000 000 (katër milionë) lekë të rinj për kurimin e deputetit të Partisë Demokratike në Qarkun e Kukësit”, shkruhej në njoftimin e asaj kohe.
Ndërkohë, deputeti tjetër që mori sot mandatin është Ligoraq Karamelo. Ai vjen nga radhët e Partisë Bashkimi për të Drejtat e Njeriut dhe është në listat e PD-së pas marrëveshjes së kësaj partie me aleatët. Karamelo ka qenë dy herë deputet i Republikës së Shqipërisë, në vitet 1997-2001 dhe 2001-2005. Sipas jetëshkrimit të botuar në Kuvendin e Shqipërisë, Karamelo ka lindur në vitin 1953 në Korçë. Ka studiuar në Universitetin e Tiranës për Fizikë. Në vitin 1996 është zgjedhur nënkryetar i Bashkisë së Korçës, si edhe anëtar i Këshillit Bashkiak të qytetit të këtij qyteti. Më parë, përgjatë viteve 1985-1996 ka qenë mësues fizike dhe drejtor i shkollës 8-vjeçare në Vranisht, drejtor i Shkollës së mesme në Progër apo i shkollës teknologjike në Korçë./Opinion.al
