Drejtori i Përgjithshëm i Arkivave, Ardit Bido, të mërkurën, deklaroi se Ismail Qemali 11 muaj pas shpalljes së Pavarësisë në tetor të 1913-ës tregoi se kishin ndërmënd që Pavarësinë t’a shpallnin në Durrës, por pakuptimi i durrsakëve u la të kuptonin se atje nuk mund të ndodhte.
“Kishim ndërmënd të banim në Durrës punën që bamë këtu; po me të vënë këmbën në atë qytet, pakuptimi i Durrësakëvet na dha të marrim vesh se një punë e tillë nuk mund të mbarohej atje E, mjerisht, nuk u ndamë vetëm me kaq, po neve që u thoshim eja të përpiqemi së bashku për shpëtimin e Atdheut t‘ënë, na përgjigjeshin: “Ju jeni tradhëtorë, ju kërkoni humbjen e vatanit, prishjen e mbretërisë; ju gënjeni se Turqia nuk e humbi e nuk humbet; ushtria e Turqisë ka zënë shumë qytete të Bullgarisë dhe tani po i kthehet Serbisë“, citohet nga fjala e Bideos, ndërsa i referohet letrës së Ismail Qemalit në tetor të 1913-ës.
