Lideri i PD, Lulzim Basha gjatë një takimi me banorë në Manzë të Durrësit tha se zhvillimet e fundit (përgjimet e Dakos, Ndokës, etj) treguan se qeveria nuk ka dalë nga vota e lirë e qytetarëve. Sipas tij, misioni kryesor i opozitës është pikërisht largimi i politikanëve të lidhur me krimin.
Deklarata e plotë e Bashës
Në Manzë, në Durrës dhe në gjithë Shqipërinë, shteti duket vetëm për të grabitur me taksa e fatura, për të prerë energjinë, për të hequr ndihmën ekonomike, për të mbyllur biznese dhe shkolla, për të shkatërruar sistemin shëndetësor dhe për të rrënuar sigurinë e familjeve tona.
Zhvillimet e muajve të fundit e kanë treguar qartë arsyen pse vendi gjendet në ketë situatë: Sepse kjo qeveri nuk ka dalë nga votat e qytetarëve shqiptarë!
Pastrimi i politikës nga politikanët e lidhur me krimin dhe dekriminalizimi i zgjedhjeve do të garantojë që kryebashkiakët, drejtorët, ministrat dhe kryeministri, tu dridhen këmbët para qytetarëve, jo kriminelëve.
Fatin e çdo politikani në këtë shtet do ta lidhim vetëm me gjykimin e qytetarëve shqiptarë!
